Aıbota Ertaıqyzy kórkem gımnastıkadan Azııa chempıonatynyń kúmis júldesin jeńip aldy
ASTANA. KAZINFORM – Búgin Bishkekte ótip jatqan kórkem gımnastıkadan Azııa chempıonatynda qazaqstandyq Aıbota Ertaıqyzy jekeleı syndaǵy kópsaıys básekesinde kúmis medal jeńip aldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Otandasymyz kópsaıysta jalpy 113.65 upaı jınady. Atap aıtsaq, shyǵyrshyqpen jattyǵýda 28.50, doppen 27.45, urshyqpen saıysta 28.70, taspamen jarysta 29 upaı nátıjeni kórsetti. Osy baǵdarlamada ózbekstandyq Tahmına Ikromova (115.10) jeńimpaz atansa, al ózbekstandyq Natalıa Ýsova (112.40) qola medalǵa qol jetkizdi.
Esterińizge sala keteıik, Aıbota byltyrǵy Sıngapýrda ótken sary qurlyq dodasynda taspa saıysynda chempıon, al kópsaıysta qola júldeger atanǵan bolatyn. Sondaı-aq bul doda kúzde Japonııada ótetin Azııa oıyndaryna daıyndyq kezeńderiniń biri sanalady.
Osyǵan deıin taekvondodan Azııa chempıonatynda Qazaqstan týrnırdi tórt medalmen aıaqtaǵany týraly jazdyq.
