Aıbolat Ystybaı Horvatııadaǵy Gran-prı týrnıriniń qola júldegeri atandy
ATYRAÝ. QazAqparat – Atyraýlyq dzıýdoshy Aıbolat Ystybaı Horvatııadaǵy Gran-prı týrnıriniń qol júldegeri atandy, dep habarlaıdy QazAqparat tilshisi.
Horvatııa astanasy Zagreb qalasynda dzıýdodan Gran-prı dodasy ótip jatyr. Oǵan 83 elden 500-den astam sportshy qatysýda.
Atyraý oblystyq dene shynyqtyrý, sport jáne týrızm basqarmasynyń baspasóz qyzmetinen málim etkendeı, Aıbolat Ystybaı el qorjynyna alǵashqy medal saldy.
Qazaqstan namysyn qorǵaıtyn qurama sapyndaǵy sportshy 66 kelige deıingi salmaqta qola júlde úshin beldesýde Kıpr ókili Georgıos Balardjıshvılımen kezdestti. Ol qarsylasyna berilgen shıdo arqyly jeńiske jetti. Bul – atalǵan týrnırde el qorjynyna túsken alǵashqy medal.
Eske sala ketelik, buǵan deıin Dzıýdodan álemdik Gran-prı jarysyna Qazaqstannan kimder baratyny habarlanǵan edi.
Álemdik dodaǵa Qazaqstannan 11 sportshy qatysyp jatyr. Olar – áıelderde arasyndaǵy 48 keli salmaqta Ábıba Ábýjaqynova, erlerden 60 kelide Damır Bolatbekov, Mereı Marhanbetov, 66 kelide Eset Qýanov, Aıbolat Ystybaı, 73 kelide Baqytjan Abdýrahmanov, Darhan Qoıbaǵar, 81 kelide Aıbar Muqyshev.
Al, 100 kelige deıingi salmaqta Bekzat Shaǵataev pen Islam Bozbaev, 100 keliden salmaqta Jambyl Turǵynalıev el namysyn qorǵaıdy.
Sondaı-aq, buǵan deıin atyraýlyq sportshy Jeńis Nurlybaev djıý-djıtsýdan álemniń eki dúrkin chempıony atanǵanyn habarlaǵan bolatynbyz.
Mońǵolııadaǵy álem chempıonatynda Jeńis Nurlybaev 56 kelide synǵa tústi. Ol qarsylastarynyń bárinen basym túsip, djıý-djıtsýdan álemniń eki dúrkin álem chempıony atandy.
