«Aıbyn-2026» jıynynda arqan tartý, estafeta jáne júzýden úzdikter anyqtaldy
ASTANA.KAZINFORM — Aqmola oblysyndaǵy «Amandyq» polıgonynda XII Halyqaralyq «Aıbyn-2026» áskerı-patrıottyq jastar jıyny jalǵasyp jatyr.
Jarys barysynda qatysýshylar ózderiniń kúsh-qýatyn, tózimdiligi men jyldamdyǵyn kórsetip, naǵyz qaısar minez tanytty. Eń tartysty kezeńderdiń biri arqan tartý saıysy boldy. Tájirıbe kórsetkendeı, bul jarysta jeńiske jetý úshin bir qara kúsh jetkiliksiz. Munda komandalyq úılesim, birlik pen durys taktıka sheshýshi ról atqarady.
Halyqaralyq sanattaǵy fınaldyq básekede Qazaqstan men Qyrǵyzstan quramalary kezdesti. Tartysqa toly sheshýshi saıysta Astanadaǵy Saǵadat Nurmaǵambetov atyndaǵy Áskerı kolledjdiń kadetteri jeńiske jetti.
— Buǵan deıingi «Aıbyn» jıyndarynda biz osy saıys túrinen turaqty túrde ekinshi nemese úshinshi oryn alyp júrdik. Al búgin qoldan kelgenniń bárin jasadyq. Biz úshin Qazaqstannyń abyroıyn asqaqtatyp, áskerı-patrıottyq klýbtardyń jas tárbıelenýshilerine úlgi kórsetý mańyzdy boldy, — dedi jeńisten keıin emotsııasyn jasyra almaǵan ulttyq quramanyń kapıtany Saǵynaı Saǵanbek.
Sol kúni polıgonda áskerı estafeta da ótti. Qarqyndy jarys qatysýshylardan joǵary deńgeıli shoǵyrlaný, jyldam áreket etý men komandalyq úılesimdi talap etti.
Jarys sharty boıynsha ár komandadan bes qatysýshy kezekpen 25 metrlik qashyqtyqty eńserdi. Árqaısysy avtomatty bólshekteý jáne jınaqtaý, áskerı jaraqty kııý, salmaǵy 15 keli bolatyn oq-dári jáshigin tasymaldaý, tikenekti sym astymen eńbektep ótý jáne sadaq atý sekildi tapsyrmalardy oryndady.
Kúnniń ekinshi jartysynda sporttyq tartys Şýchınsk qalasyndaǵy Olımpıadalyq daıarlyq ortalyǵynda jalǵasty. Munda júzý jarystary ótti. Óz komandalarynyń namysyn qorǵaǵan qatysýshylar ár sekýnd úshin kúresti. Bul saıysta durys tynys alý, júzý tehnıkasy jáne estafetany joǵary jyldamdyqpen tapsyrý sheberligi mańyzdy ról atqardy.
Aýqymdy shara óz máresine jaqyndap keledi. Degenmen uıymdastyrýshylardyń basty jetistigi retinde qatysýshylar arasynda qalyptasqan dostyq, ózara qurmet pen saýatty básekelestik atmosferasyn ataýǵa bolady.
— «Aıbyn» jıynyna qatysý úshin Qazaqstanǵa alǵash kelýim. Áserim óte jaqsy. Munda erekshe dostyq pen ózara syılastyqty sezdim. Birneshe kúnniń ishinde ártúrli elden kelgen jastarmen dostasyp úlgerdik. Estafeta biz úshin qıyn bolǵan joq. Sebebi óz elimizde osyndaı kedergiler jolaǵynan ótýdi muqııat jattyqtyrdyq. Sondyqtan jarys barysynda ózimizdi senimdi sezinip, jaqsy nátıje kórsettik, — dedi Qyrǵyz ulttyq áskerı lıtseıiniń tárbıelenýshisi Ájibek Rysqulov.
Aıta keteıik, qatysýshylardyń sheberligin synaıtyn basty kezeń — «Kúshimiz birlikte» áskerı-taktıkalyq oıyny bolady. Alaıda qazirdiń ózinde bul jıynnyń eń mańyzdy nátıjesi kýboktar men medaldar ǵana emes, ortaq synaqtar men adal básekede shyńdalǵan berik dostyq ekeni anyq.
Aıta ketelik «Aıbyn-2026» halyqaralyq jıynynda jarystyń negizgi kezeńderi ótken edi.
