«Aıbyn-2026» halyqaralyq jıynynda jarystyń negizgi kezeńderi ótti
ASTANA. KAZINFORM — Qazaqstan Respýblıkasy Qorǵanys mınıstrliginiń Shoqan Ýálıhanov atyndaǵy Áskerı kolledjiniń «Amandyq» polıgonynda ótip jatqan XII Halyqaralyq «Aıbyn-2026» áskerı-patrıottyq jastar jıyny aıasyndaǵy jarystar qyza tústi. Bul týraly Qorǵanys mınıstrligi málim etti.
Uldar arasynda týrnıkte tartylý, qyzdar arasynda deneni shalqasynan jatyp kóterý saıystary, sondaı-aq Smart Sarbaz baıqaýy men «Aıbyn daryny» zııatkerlik oıyny aıaqtaldy.
Jarystyń eń áserli ári kúrdeli kezeńderiniń biri — áskerı kross boldy. Ár komandadan tórt qatysýshy bir shaqyrymdyq qashyqtyqty eńserdi. Sonymen qatar olar granata laqtyryp, úsh oqpen 10 metr qashyqtyqtan nysanany kózdedi.
Bul áskerı-qoldanbaly saıysta Ózbekstannyń «Vatan taıanchı» áskerı-patrıottyq qozǵalysynyń ókilderi erekshe kózge tústi. Egiz aǵaıyndylar Hasan men Hýsan Hojımýratovtar syrtqy uqsastyqtaryn ǵana emes, jeńiske degen ortaq jigerlerin de kórsetti. Máre syzyǵyna deıin bir-birine qoldaý kórsetip, uıymshyldyq pen qaısarlyqtyń úlgisin tanytty.
— Biz jarystyń erekshe dostyq atmosferasyn atap ótkimiz keledi. Munda ártúrli elden kelgen qatysýshylar arasynda ózara qurmet pen shynaıy baýyrlastyq ornaǵan. Barlyq kezeńder joǵary deńgeıde uıymdastyrylǵan. Bul jıynǵa qatysý óz kúshimizdi synap qana qoımaı, jańa bilim, daǵdy jáne bolashaqta qajet bolatyn qundy halyqaralyq tájirıbe jınaýǵa múmkindik beredi, — dedi aǵaıyndylar.
Jarystyń ár kezeńinde óz kóshbasshylary men rekord ıeleri boldy. Máselen, avtomatty jartylaı bólshekteý jáne jınaqtaý jattyǵýynda Almaty qalasyndaǵy Qazaqstan Qarýly kúshteriniń «Jas desantshy» áskerı-patrıottyq klýbynyń tárbıelenýshisi Álıhan Hamıt normatıvti nebári 8 sekýndta oryndady.
— Klýbtaǵy sabaqtar maǵan tártipti, tózimdilikti jáne komandada jumys isteýdi úıretti. «Aıbyn» jıynyna úshinshi jyl qatarynan qatysyp otyrmyn. Bul — meniń saıystaǵy sońǵy synaǵym. Alda ómirimniń jańa kezeńi — mamandyq tańdaý tur. Men bolashaǵymdy zań salasymen baılanystyrýdy sheshtim. Azamattardyń quqyqtaryn qorǵap, elimniń zańyna qyzmet etkim keledi. Jarysta bar kúshimdi saldym jáne jaqsy nátıje kórsettim, — dedi jas desantshy.
Bekitilgen baǵdarlamaǵa sáıkes klýbtar men oqý oryndarynyń tárbıelenýshileri pnevmatıkalyq myltyqtan atý sheberlikterin de kórsetti.
Aıta keteıik, «Aıbyn juldyzy» shyǵarmashylyq baıqaýy kún saıyn tústen keıin qatysýshylar sanattary boıynsha ótkiziledi.
Búgin óńirlik áskerı-patrıottyq klýbtar men áskerı mektepterdiń komandalary óz ónerlerin kórsetti.
Erteń Qazaqstannyń kúshtik qurylymdarynyń ókilderi óz sheberlikterin pash etedi.
Eske sala keteıik, Qorǵanys mınıstrliginiń Shoqan Ýálıhanov atyndaǵy áskerı kolledjiniń «Amandyq» polıgonynda ótip jatqan «Aıbyn-2026» XII halyqaralyq áskerı-patrıottyq jastar jıyny aıasyndaǵy jarystarǵa Qazaqstan, Ázerbaıjan, Qyrǵyzstan, Reseı jáne Ózbekstannan kelgen myńǵa jýyq ul-qyz qatysyp jatyr.
