Aıbek Smadııarov Syrtqy ister mınıstrliginiń Resmı ókili qyzmetinen ketti
ASTANA. KAZINFORM – Aıbek Smadııarov QR Syrtqy ister mınıstrliginiń Halyqaralyq aqparat komıtetiniń tóraǵasy – Resmı ókili qyzmetinen ketti. Bul laýazymda A.Smadııarov 8 jyl qyzmet atqarǵan.
Qyzmetten ketý sheshimi týraly ol mınıstrlikte ótken aptalyq brıfıngide málim etti.
– Men bul kúnge daıyndalyp júrdim. Bul kenetten qabyldanǵan sheshim emes, ózimniń jeke sheshimim. Segiz jyl boıy osy minberde turdym… Osy jyldary elimiz syrtqy saıasatta kóptegen kezeńnen ótti, kóptegen másele boldy. Tek sizderdiń arqalaryńyzda búkil álem Qazaqstandy tanydy. Sizder Syrtqy ister mınıstrligine orasan zor qoldaý kórsettińizder, – dedi Aıbek Smadııarov.
Aıbek Smadııarov II synypty Tótenshe jáne Ókiletti Ýákil dıplomatııalyq dárejege ıe. Qazaq, orys, aǵylshyn jáne túrik tilderin meńgergen. Ol 1983 jylǵy 7 shildede Ońtústik Qazaqstan oblysynda dúnıege kelgen. 2004 jyly Abylaı han atyndaǵy Qazaq halyqaralyq qatynastar jáne álem tilderi ýnıversıtetin bitirgen.
Eńbek jolyn 2005 jyly «Qazaqstandaǵy Qytaı banki» AQ Ákimshilik departamentiniń mamany retinde bastaǵan. 2006 jyldan 2008 jylǵa deıin QR Syrtqy ister mınıstrligi Konsýldyq qyzmet departamentiniń mamany retinde qyzmet atqardy.
2008-2010 jyldary QR SІM Eýropa departamentiniń attashesi jáne úshinshi hatshysy laýazymdarynda jumys istedi.
2010-2012 jyldar aralyǵynda Qazaqstannyń Majarstandaǵy Elshiliginde úshinshi hatshy qyzmetin atqardy.
2012 jyldan 2013 jylǵa deıin QR Prezıdentiniń Baspasóz qyzmetinde sarapshy, al 2013-2014 jyldary QR SІM Syrtqy saıası saraptaý men boljamdaý komıtetiniń birinshi hatshysy laýazymyn atqardy.
2014 jyldan 2018 jylǵa deıin Vetnamdaǵy QR Elshiliginde ekinshi jáne birinshi hatshy qyzmetinde jumys istedi.
2018-2019 jyldary QR SІM baspasóz qyzmetin basqaryp, 2019-2023 jyldar aralyǵynda QR SІM Halyqaralyq aqparat komıteti tóraǵasynyń orynbasary – baspasóz hatshysy laýazymyn atqardy.
2023 jylǵy maýsymnan bastap QR SІM Kommýnıkatsııalar departamentiniń dırektory – Resmı ókili boldy.
2025 jyldyń 4 naýryzynda QR SІM Halyqaralyq aqparat komıtetiniń tóraǵasy — Resmı ókil bolyp taǵaıyndaldy.