Aıbek Smadııarov Reseı SІM resmı ókiliniń málimdemesine qatysty pikir bildirdi

ASTANA. QazAqparat – Ýkraına Syrtqy ister mınıstrliginen Astanadaǵy jańa elshini taǵaıyndaý týraly ótinish tústi. Bul týraly QR Syrtyqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

Búgin Májilistegi brıfıngide A. Smadııarov Reseı Syrtqy ister mınıstrliginiń resmı ókili Marııa Zaharovanyń Ýkraına Elshisiniń Qazaqstannan «shyǵarylýyna» qatysty túsiniktemesine pikir bildirdi.

«Onyń málimdemesiniń ózegi Qazaqstan men Reseıdiń teń quqyly strategııalyq seriktester retindegi odaqtastyq qatynastarynyń sıpatyna qaıshy keletinin atap ótkim keledi. Ózderińiz biletindeı, Ýkraına tarapyna, sondaı-aq jurtshylyqqa Vrýblevskıı myrzanyń arandatýshylyq minez-qulqyna qatysty Qazaqstan Syrtqy ister mınıstrliginiń ustanymy jetkizildi. Munymen qosa, Ýkraına tarapyna Petr Vrýblevskııdiń qazaqstandyqtardyń, ásirese, etnıkalyq orystardyń sezimderine nuqsan keltiretin qolaısyzdyǵy týraly aıtyldy», - dedi QR SІM resmı ókili

Onyń aıtýynsha, qazirgi ýaqytta Ýkraına Syrtqy ister mınıstrliginen Astanadaǵy jańa elshini taǵaıyndaý týraly ótinish tústi. Ýkraına jaǵymen osy másele boıynsha bizde tolyq túsinistik bar jáne eki jaqta da barlyq kelisimder oryndaldy.

«Ýkraına elshisiniń elimizde «jaǵymsyz» mártebesi bar ekenin jáne onyń Qazaqstan Syrtqy ister mınıstrliginde nemese basqa da memlekettik vedomstvolarda qandaı da bir kezdesýleri josparlanbaǵanyn habarlaımyz», - dedi Aıbek Smadııarov.

Budan buryn habarlanǵandaı, bıyl tamyz aıynda Ýkraına Elshisi Petr Vrýblevskıı blogerge suhbatyna qatysty QR Syrtqy ister mınıstrligine shaqyryldy.

Foto:gov.kz