Aıbek Smadııarov pandemııa kezinde Ýhannan stýdentterdi qalaı alyp shyqqandaryn eske aldy
«Ýhanda koronavırýs oshaǵy anyqtalǵan kezde eń birinshi bizdiń eldiń stýdentterin tasymaldaǵan ushaǵy ushyp keldi. Bizdiń Beıjińdegi dıplomattardyń myqtylyǵy sonsha, eń birinshi bolyp bizdiń ushaq 3 memlekettiń stýdentterin alyp shyqty.
Ýhan qalasy jabyq, aerodrom jabyq. Ózderińiz de kórdińizder ǵoı, bir adam kirip, shyǵa almaıdy. Tankimen de turdy, bárimen turdy. Qytaı azamattary qashyp ta jatty, kirip te jatty. Sonyń arasynan 200-300 stýdentti qalaı alyp shyǵamyz dep kúni-túni oılandyq. Ushaq daıyn, aqsha bar, stýdentter bir qonaqúıge jınalǵan, bári daıyn. Biraq, kirip-shyǵý qıyn. Qytaı bıliginiń ókilderine habarlassaq, bir de bir notamyzǵa, bir de bir telefon qońyraýyna jaýap bermeıdi. Sonymen Qytaıdyń osy jerdegi Elshiligi arqyly sóılesip, Beıjińdegi bılikpen máseleni sheshti. Bizge az ǵana ýaqyt berdi.
«3 saǵattaryń bar. Sol ýaqyttyń ishinde qonyp, stýdentterińdi alyp shyqsańdar, shyqtyńdar. Úlgermeseńder, qala jabylady», - dedi. Bizge ǵana sondaı talap qoıyldy. 3 saǵattyń ishinde kirip, alyp shyqtyq»,- dep eske aldy SІM resmı ókili.
Onyń aıtýynsha, alǵashynda koronavırýs týraly málimettiń az bolýy Ýhanǵa barǵan ekıpajdyń ishinde biraz úreı týdyrǵan.
«Ushaq kelip qonǵannan keıin ekıpaj dalaǵa shyqqysy kelmeıdi. Qorqady, koronavırýs jańadan shyǵyp jatqandyqtan qalaı bolatynyn eshkim bilmeıdi. Sodan elimizdiń Syrtqy ister mınıstrliginen qytaısha biletin adam izdedik. Bir adam shyǵyp, tizimdegi stýdentterdi túgendep, jergilikti bılik ólkiderimen qaǵaz almasyp, «osynsha stýdentti alyp shyǵyp bara jatyrmyz» dep vızalardy durystap, alyp shyǵýy kerek edi. Ol adamdy tabý ońaı bolǵan joq. Qytaısha biletin dıplomattardyń arasynda biraz daý boldy. Solardyń arasynan bir jigit shyqty. Sol baryp, 3 saǵattyń ishinde 200-den astam adamdy ushaqqa alyp keldi», - dedi Aıbek Smadııarov.
Syrtqy ister mınıstrliginiń ókiliniń sózine qaraǵanda, pandemııa kezinde vedomstvo tarapyna áleýmettik jeli arqyly júginýshilerdiń sany eselep artqan.
«Koronavırýs kezinde áleýmettik jelide bizdiń mınıstrlikti tegteýshiler kóp boldy. Saǵatyna myńnan asa teg shyǵyp jatty. «MID, pomogı!», «Tokaev, otprav samolet!», «My týt ýmıraem!» degen sııaqty tegtiń bári oryssha ketti. Biz ne isteımiz? Bizdiń memleket qana emes, búkil el jabylyp qaldy. Áýejaılar jumys istemeıdi. Memleketter arasyndaǵy shekaralar jabyq. Ómiri jabylmaıtyn Shengen elderi shekaralaryn jaýyp tastady. Ony aıtasyz, myna Máskeýdegi Sheremetevo men Vnýkovo áýejaılarynyń arasynda baılanys joq. Bizdiń Eýropada júrgen azamattar Vnýkovoǵa ushyp keledi, Qazaqstanǵa Sheremetevodan ushýy kerek. Arada 1 saǵat ýaqyt qana bar. Vnýkovodan Shremetevoǵa 1 saǵattyń ishinde ushyp kele almaıdy. Máseleni sheshý úshin elimizdiń Premer-Mınıstrine habarlastyq. Bizdiń Premer-Mınıstr Reseı Premer-Mınıstrine telefon shalyp, eki áýejaı arasyna bizdiń azamattarymyzǵa jeke konvoı berip, tasymaldaýǵa ruqsat suradyq. ıAǵnı kishigirim jumys bolsa da, joǵary deńgeıde sheshimin tabatyn máseleler bar»,- dedi SІM resmı ókili.
