Aıbek Smadııarov HAMAS-taǵy atystardyń toqtaýyna baılanysty pikir bildirdi
ASTANA. KAZINFORM – Syrtqy ister mınıstrliginiń resmı ókili Aıbek Smadııarov Izraıl men HAMAS arasyndaǵy tatýlyq týraly mámilelerge qatysty Qazaqstannyń ustanymyn aıtty.
- Biz Izraıl men HAMAS arasyndaǵy atysty toqtatý týraly kelisimdi qýattaımyz. Qatar, Egıpet jáne AQ memleketteriniń ara aǵaıyndyq talpynystaryn joǵary baǵalaımyz. Bul kúsh qoldanýdy toqtatyp, kepildegilerdi bosatýǵa, Gaza sektoryna gýmanıtarlyq kómek jetkizýdi kúsheıtýge jasalǵan mańyzdy qadam. Qazirgi jaǵdaıda bul aýadaı qajet sharalar. Qazaqstan árdaıym beıbitshilik jaǵynda. Bul kelisimder qaqtyǵysty erte retteýge jasalǵan qadamdardyń negizin saldy dep úmittenemiz, - dedi ol Kazinform tilshisine.
Aıbek Smadııarov bul máselede Qazaqstan BUU aıasyndaǵy negizgi sheshimderdi ustanatynyn eske saldy.
- Qazaqstan Palestına-Izraıl qaqtyǵysyn «eki halyqqa eki memleket» formýlasy negizinde sheshýdi tabandy túrde qoldap keledi. Bul eki táýelsiz memleket qurý kerek degen sóz. Palestındikter men ızraıldikter osy eki memlekette qaýpisiz ári beıbit ómir keshe alar edi. Biz halyqaralyq qaýymdastyqtyń uzaq merzimge beıbitshilik ornatyp, ádildik qalyptastyrýǵa baǵyttalǵan talpynystaryn qoldaýǵa daıynbyz, - dedi SІM resmı ókili.
Eske salsaq, eki kún buryn Izraıl premer-mınıstriniń keńsesi delegatsııalar Dohadaǵy kelissózder kezinde atysty toqtatý týraly kelisimge qol qoıǵanyn resmı túrde rastady.