Aıbek Oralbaıdyń ákesi: Ulym chempıon bolamyn dep ýáde berip ketken
ASTANA. KAZINFORM – Lıverpýlde ótken bokstan álem birinshiliginde Qazaqstan sportshylary 7 altyn, 1 kúmis jáne 2 qola alyp, eń úzdik nátıje kórsetti. Ásirese jetinshi sheshýshi jeńisti qurama kapıtany, asa aýyr salmaqtaǵy Aıbek Oralbaı qanjyǵaǵa saldy jáne elimizdi teń turǵan Ózbekstan quramasynan bir saty joǵarylatty. Chempıonnyń ákesi Rahat Oralbaı «Jibek joly» telearnasyndaǵy «Búgin LIVE» baǵdarlamasyna suhbat berip, mańyzdy jekpe-jek týraly aıtyp berdi.
– Ár ata-ananyń armany – balasynyń bıik belesten kóringeni ǵoı. Bul fınal óte qıyn boldy. Aıbek úshin, basqa balalar úshin de taqym qysyp otyrdyq. Ulymyzdyń ózi “Áke, men chempıon bolýǵa bara jatyrmyn, artymda qazaq eli tur, kapıtan ekenimdi dáleldeımin” dep ýáde berip ketken, – dedi Rahat Oralbaı.
Byltyr qyrkúıek aıynda Aıbek Oralbaı asa aýyr salmaqqa aýysyp, bokstan Qazaqstan quramasynyń kapıtany atanǵan edi.
– Byltyrǵy Parıj oıyndarynan keıin Qamshybek aǵasy (Qońqabaev – red.) Aıbekke oryn berdi. Aıbek te osy sheshimmen kelisip, asa aýyr salmaqta úlken jarystarǵa qosyldy. Túnde jarystan keıin ózderi habarlasty, kózimizge jas alyp, qazaq elin bıikke kótergenin maqtan ettik. Muny sózben aıtyp jetkizý qıyn. Barlyq boksshylar tyńǵylyqty daıyndalǵan, bul jarystarǵa eshkim daıyndyqsyz barmaıdy. Bapkerlerine, federatsııa basshylaryna rahmet aıtamyz, – dedi R. Oralbaı.
Eske sala ketsek, byltyr Parıj Olımpıada oıyndarynda Aıbek Oralbaı shırek fınalǵa deıin jetken edi. Onyń syńary Nurbek Oralbaı 80 keli salmaqta Olımpıadanyń kúmis júldegeri boldy.
Aıta keteıik, Álem birinshiligine 68 elden 540 boksshy qatysty. Qazaq sportshylary 7 altyn, 1 kúmis jáne 2 qola jeńip alyp, jalpy esepte úzdik atandy jáne tarıhı jeńister syılady.
Memleket basshysy Qasym-Jomart Toqaev bokstan Álem chempıonatynda top jarǵan boksshylardy quttyqtady.
Buǵan deıin Mahmud jáne Tórehan Sabyrhannyń anasy Meńtaı Ásilova baǵdarlamaǵa suhbat bergen edi.