Aıbek Oralbaı Parıj olımpıadasyna joldama jeńip aldy
ASTANA. KAZINFORM - Italııanyń Býsto-Arsıtsıo qalasynda ótip jatqan lıtsenzııalyq týrnırde búgin birinshi bolyp sharshy alańǵa shyqqan Aıbek Oralbaı shırek fınalda AQSh boksshysy Djamar Tellıdi utyp, Parıj olımpıadasyna joldama jeńip aldy.
Bul Italııa sharshy alańyndaǵy qazaq boksshylarynyń alǵashqy jeńip alǵan joldamasy. Al jalpy qazaq boksshylarynan erler arasyndaǵy ekinshi joldama. Osyǵan deıin bokstan Parıjge joldama erler arasynda +92 kg salmaqta óner kórsetetin Qamshybek Qońqabaevtyń qolynda ǵana bolǵan. Ol Olımpıada joldamasyn byltyr Qytaıdyń Hanchjoý qalasynda ótken Azııa oıyndarynda jeńip alǵan bolatyn.
Endi Astana ýaqytymen 19:30 shamasynda 75 keli salmaqta áıelder arasynda Valentına Halzova Ulybrıtanııa boksshysy Kındı Ngambamen Olımpıada joldamasyn sarapqa salady.
Al keshki sessııada 50 kelide Alýa Balqybekova Germanııa boksshysy Maksı Karına Kloetzermen qolǵap túıistiredi. Jekpe-jek ýaqyty 23:00-ge josparlanǵan.
Al 51 kelide Sáken Bıbosynov ulybrıtanııalyq Kıaran Makdonaldpen 00:00 ýaqyt mólsherinde sharshy alańǵa shyǵady. Sáken Bıbosynovtyń qarsylasy Eýropa chempıonatynyń kúmis júldegeri,
57 keli salmaqta synǵa túsip jatqan jerlesimiz Sabyrhan Mahmud tájikstandyq 2011 jyly Astana tórinde ótken jasóspirimderdiń álem chempıonatynda top jarǵan jáne 2011 jyly álemde eń myqty jasóspirim ataǵyn jeńip aldy Asror Vohıdovpen qolǵap túıistiredi. Jekpe-jek 00:30 shamasyna josparlanǵan.
Sabyrhan Mahmudtan keıin ile-shala 71 keli salmaqtaǵy otandasymyz Aslanbek Shymbergenov Ázerbaıjan boksshysy Varhan Alıevpen kúsh synasady. Onyń qarsylasy 2021 jylǵy álem chempıonatynyń qola júldegeri.
Sonymen qatar 80 keli salmaqtaǵy jerlesimiz Nurbek Oralbaı Astana ýaqytymen 01:30 shamasynda 2021 jylǵy álem chempıonatynyń shırek fınalısi, Eýropa oıyndarynyń kúmis júldegeri Irlandııa boksshysy Kelın Kassıdımen Olımpıada joldamasyn sarapqa salmaq.
Aıta ketsek, lıtsenzııalyq týrnırde jartylaı fınalǵa deıin jetken boksshylar 2024 jylǵy Olımpıada oıyndaryna joldama alady.
