Aıbek Oralbaı mansabyndaǵy eń mańyzdy sheshimi týraly aıtty
ASTANA. KAZINFORM – Bokstan Qazaqstan ulttyq quramasynyń kapıtany Aıbek Oralbaı sýperaýyr salmaq dárejesine aýysýyna ne sebep bolǵanyn jáne jekpe-jekterge qalaı daıyndalatynyn aıtyp berdi, dep habarlaıdy Qazaqstan boks federatsııasy.
Boksshynyń aıtýynsha, salmaq dárejesin ózgertý týraly usynysty alǵash bolyp jeke bapkeri Asqar Erkebaev aıtqan. Alaıda sportshy bul sheshimdi birden qabyldamaǵan.
Ol biraz ýaqyt 90 keli salmaqta óner kórsetip, keıin 90 keliden joǵary salmaq dárejesinde de kúsh synap kórgen. Osylaısha jańa sanattyń ózine qanshalyqty qolaıly ekenin baǵalaýǵa múmkindik alǵan.
– Jeke bapkerim Asqar Erkebaev basqa salmaq dárejesine aýysqan durys bolatynyn aıtty. Biz bul týraly uzaq oılandyq. 90 keli salmaqta týrnırlerge qatysyp júrdik, keıin 90 keliden joǵary salmaqty da baıqap kórdik. Biraz ýaqyt qajet boldy, biraq qazir bul óte durys sheshim bolǵanyna senimdimin. Sońǵy sheshimdi ózim qabyldadym, – dedi Aıbek Oralbaı.
Onyń sózinshe, jańa salmaqtaǵy alǵashqy mańyzdy jarystardyń biri Taılandta ótken Azııa chempıonaty bolǵan. Sol dodada ol chempıon atanǵan.
Keıin Anglııanyń Lıverpýl qalasynda ótken álem chempıonatynda sýperaýyr salmaqta ózin erkin sezinetinin túsinip, osy sanatta birjola qalýǵa sheshim qabyldaǵan.
Aıbek Oralbaı sýperaýyr salmaqta óner kórsetý úshin mindetti túrde dene salmaǵyn arttyrý qajet degen pikirmen kelispeıdi.
Boksshynyń aıtýynsha, bul salmaqta qarsylastardyń dene bitimi men salmaǵy ártúrli bolýy múmkin. Máselen, ózi 100 keli tartsa, qarsylasynyń salmaǵy 125 nemese 135 kelige jetýi yqtımal.
Soǵan qaramastan ol salmaǵyn ádeıi kóbeıtpeýdi jón kórgen. Óıtkeni artyq salmaq qımyl-qozǵalysty baıaýlatyp, rıngtegi jyldamdyqqa keri áser etýi múmkin.
– Keıbir týrnırler arasynda salmaǵym qatty ósip ketken kezder boldy. Jeńilister de kezdesti. Sol ýaqyttan bastap salmaǵymdy qatań baqylaýǵa aldym. Rıngke qandaı fızıkalyq daıyndyqpen shyǵý kerektigin naqty túsindim. Kópshilik sýperaýyr salmaqtaǵylar salmaǵyn baqylamaıdy dep oılaıdy. Shyn máninde, biz tamaqtaný tártibin de, jattyǵý protsesin de muqııat qadaǵalaımyz, – dedi boksshy.
Aıta keteıik, Aıbek Oralbaı buǵan deıin 92 kelige deıingi salmaqta tabysty óner kórsetken. Ol 2018 jyly jasóspirimder Olımpıadasynyń jeńimpazy, 2022 jyly Azııa chempıony atandy.
2024 jyldyń mamyrynda Elorda Cup týrnırinde sýperaýyr salmaqta alǵash ret baq synap, Parıj Olımpıadasynan keıin osy sanatta birjola qaldy.
2025 jyldyń qyrkúıeginde Lıverpýlde ótken World Boxing álem chempıonatynda altyn medal jeńip aldy. Al 2026 jyly Aıtı-Nagoıada ótken Azııa oıyndarynyń fınalynda ózbekstandyq Jahongır Zokırovty tóreshilerdiń biraýyzdan shyǵarǵan sheshimimen 5:0 esebimen jeńdi.
Aıta keteıik, buǵan deıin Aıbek Oralbaıdyń 2026 jylǵy Azııa oıyndarynda 90 keliden joǵary salmaq dárejesinde fınalǵa shyǵyp, ózbekstandyq Jahongır Zokırovpen kezdesetini habarlanǵan bolatyn.
