Aıbek Nuǵymarov koronavırýsty emdeıtin ımmýndyq plazma donory boldy
SEMEI. QazAqparat – Semeı qalasynda koronavırýspen aýyryp shyqqan bilim mekemeleriniń basshylary ımmýndyq plazma donory boldy. Olardyń arasynda elektrtehnıkalyq kolledj dırektory Azat Sarpekov pen kólik kolledjiniń dırektory, qazaqsha kúresten álemniń úsh dúrkin chempıony, «Álem barysy» jarysynyń eki dúrkin jeńimpazy Aıbek Nuǵymarov bar, dep habarlaıdy QazAqparat.
Qaladaǵy eki jetekshi kolledjdiń dırektorlary qaýipti derttiń barlyq aýyrtpalyǵyn bastan ótkizip, koronavırýsqa shaldyqqandarǵa qol ushyn sozyp, onymen kúres jolyna túspek bolǵandary jaıly baıandady.
«Dárigerlerdiń arqasynda aýrýdan tolyq jazylyp shyqtym. Búginde plazma donory bolý múmkindigi bar. Koronavırýspen aýyrǵan adam retinde basqa adamdarǵa kómektesýge daıynmyn. Meniń qanym bireýdiń saýyǵyp ketýine kómegin tıgizse, tek qana qýanamyn», - dep atap ótti A.Sarpekov.
Qalalyq aqparat ortalyǵy Semeı qalasynyń Qan ortalyǵynda COVID-19-ǵa antıdenesi bar ımmýndyq plazma daıarlaý úshin donorlar tizimi jasalyp jatqanyn habarlady.
Immýndyq plazma – adam qanynyń qandaı da bir ınfektsııalyq agentterge qarsy antıdeneden quralǵan bóligi. Mysaly, koronavırýs ınfektsııasymen aýyrǵan adamdardyń plazmasynda bul aýrýmen kúresýge kómektesetin antıdene bar.
Koronavırýspen aýyrǵan adamdardyń ımmýndyq plazmasyn qaıta quıý kezinde retsıpıentte passıvti ımmýnıtet qalyptasyp, oǵan bul dertpen kúresýge kómektesedi.
Koronavırýspen aýyrǵandardyń bári birdeı ımmýndyq plazma donory bola almaıdy. Plazmany daıarlaý úshin koronavırýs ınfektsııasyna antıdene jetkilikti adamdar ǵana donor bola alady. Immýndyq plazmany qaıta quıý naýqastardy emdeý jáne saýyqtyrý protsesin jyldamdatady.
Eske sala keteıik, Semeı kólik kolledjiniń dırektory, Qazaq kúresinen álem chempıony, «Álem barysy» týrnıriniń eki dúrkin jeńimpazy Aıbek Nuǵymarov koronavırýs juqtyrǵan bolatyn.
