Aıbek Nuǵymarov qazaq kúresinen álem chempıonatyna qatysady
ASTANA. QazAqparat - Astanada 27-29 qazan aralyǵynda qazaq kúresinen ótetin álem chempıonatynda el namysyn kimderdiń qorǵaıtyny belgili boldy, dep habarlaıdy QazAqparat tilshisi.
Bul týraly «Qazaq kúresi halyqaralyq federatsııasy» málim etti. Elimizdiń ulttyq oıynyna álemniń túkpir-túkpirinen 40 memlekettiń sportshylary qatysady. Olardyń qatarynda AQSh, Qytaı, Avstralııa, Úndistan, Lıtva, Reseı, Belgııa, Kamerýn bastaǵan elderdiń eń tańdaýly balýandary bar.
Osy álem birinshiliginde 55 keli salmaqta el namysyn Marat Nyǵmatýllaev qorǵaıtyn bolsa, 60 keli salmaqta Qýanysh Ysqaqov beldesedi. 66 keli salmaqta Qasymhan Tólenbaı boz kilemge shyqsa, 74 keli salmaqta Ǵalymjan Ábdirahmanov beldesedi. 82 keli salmaqta Ersultan Muzafarovqa úmit artsaq, 90 kelide Ádiljan Ystybaev kúres alańyna shyǵatyn bolady.
Al 100 keli salmaqta Aleksandr Kosachev synǵa tússe, asa aýyr salmaqta osyǵan bir aı buryn «Álem Barysy» ataǵyn jeńip alǵan Aıbek Nuǵymarov el namysyn qorǵaıdy. Al absolıýtty chempıon ataǵyna Aıbat Seıten talasatyn bolady.
Jalpy tól sportymyzdan ótkeli otyrǵan dodaǵa 40 memleketten 167 balýan keledi dep kútilýde. Atalǵan balýanǵa 30 tóreshi qazylyq etedi. Onyń 9-y sheteldik qazylar bolmaq.
Aıta keteıik, chempıonat 8 salmaq dárejesi jáne absolıýttik dáreje boıynsha ótedi. 27 qazanda «Han shatyr» oıyn-saýyq ortalyǵynda sportshylardyń salmaq ólsheý jáne jerebe tastaý rásimi ótse, 28-29 qazan kúnderi «Barys-Arena» muzaıdyny saraıynda jarys ótedi.
Birinshiliktiń alǵashqy kúni sportshylar 55, 90, 100 jáne +100 kelide beldesse, ekinshi kúni 60, 66, 74, 82 jáne absolıýttik salmaq dárejesi boıynsha myqtylar anyqtalmaq.
