Aıbek Nuǵymarov: Egemendiktiń arqasynda qazaq kúresi álemdik deńgeıge jetti

ÓSKEMEN. QazAqparat – Qazaq kúresinen QR eńbek sińirgen sport sheberi, 2017 jyly «Álem barysy» atanǵan Aıbek Nuǵymarov «Táýelsiz Qazaqstan: Jasampazdyqqa toly jyldar. Shyǵys Qazaqstan oblysynyń basty jetistikteri» atty dóńgelek ústelde eldegi sport salasynyń qalaı damyp kele jatqandyǵyn aıtty, dep habarlaıdy QazAqparat tilshisi.

«Elimizdiń egemendik alýy qazaq sportshylarynyń jolyn ashyp berdi. Otyz jyldyń ishinde halyqaralyq dodalarda jerlesterimizdiń jetken jetistikteri barshylyq. Qazaqstannyń atyn shyǵaryp, el namysyn abyroımen qorǵap júrgen sportshylarymyz az emes. Bunyń barlyǵy tek táýelsizdiktiń arqasynda múmkin boldy», - deıdi Aıbek Nuǵymarov.

Onyń aıtýynsha, Olımpıada oıyndarynda talaı álem chempıondary shyǵyp, ánurandy asqaqtatyp, kók týdy jelbiretti.

Egemendiktiń arqasynda ultymyzdyń tól sporty – qazaq kúresi álemdik deńgeıge jetti. Elimizdiń túkpir-túkpirinde, onyń ishinde Shyǵys Qazaqstandaǵy aýyldarǵa talaı sporttyq keshender salynyp, óskeleń urpaqqa qajetti jaǵdaı jasaldy. Búgingi jastarǵa sportpen aınalysýǵa esh kedergi joq. Kerisinshe qandaı baǵytty tańdasa da alańsyz jattyǵyp, kásibı shyńdalýyna barlyq múmkindik bar. Mine, sol úshin táýelsizdikti baǵalaı bileıik, - deıdi qazaq balýandary arasynan tuńǵysh «Álem barysy» atanǵan Aıbek Nuǵymarov.