Aıbek Nuǵymarov 1/2 fınalda jeńilgen mońǵolııalyqtyń narazylyǵyna jaýap berdi
Tilshiler qaýymy Mońǵolııa balýany Serik Berdimurat jartylaı fınaldy jeńistiń Aıbekke berilýine narazylyq bildirýi týrasynda suraq qoıdy. Buǵan qatysty Aıbek óz oıyn bildirip, beldesý erejege sáıkes ótkenin atap ótti.
«Mońǵolııa balýany ózimizdiń qandas baýyrymyz. Eshqandaı ádiletsizdik bolǵan joq dep oılaımyn. Bir búk upaımen uttym. Kúres kezinde upaıdyń bári eseptelip, tablodan kórsetildi. Shyndyǵyn aıtqanda, «jerebe aldyn ala tartylǵan» degen sózder kishkene qıyn eken. Jerebe boıynsha qıyn topqa túsip qaldym. Ózderińiz kórgendeı, birinshi dodadan bastap polıak balýanymen, odan keıingi ózbek balýanymen, «Qazaqstan barysy» atanǵan Elaman baýyrymyzben bolǵan kezdesýlerdiń eshqaısysy ońaı túsken joq. Búgin shyny kerek, maǵan aýyrlaý boldy. Osydan 15 kún buryn kelip, arnaıy jattyǵýdan ótken bolatynbyz. Men úshin eńbek aqtaldy degen oıdamyn», - deıdi «Álem barysy».
Aıbek sonymen birge Elaman Erǵalıevpen bolǵan kezdesýge qatysty oıyn bildirdi.
«Elamannan 2015 jyly utylyp qalǵan bolatynmyn. Ol óte myqty balýan. Salmaǵy da menen aýyr. Kez kelgen adam «Qazaqstan barysy» bola bermeıdi. Beldesýge toqtala ketsek, basynda, ras, eki ret búkke túsip qaldym. Odan keıingi ádis jasaǵan kezde ózim aınaldyryp, janǵa túsirdim. Ary qaraı taǵy bir-eki búk boldy. Jańa bir aǵalarymyz joldan kesip, qashyp kúresýge bolmaıdy dep aıtyp jatyr. Men eshqashan qashyp kúrespegenmin. Kúreste keıde qashatyn kez de bolady. Alǵa umtylatyn jeri de bolady. Qashtyń ne, alǵa umtyldyń ne, kimniń qolyn kóterdi - sol jeńiske jetti. Men álsizdik kórsettim dep oılamaımyn», -deıdi Aıbek.
Balýan sondaı-aq aqtyq básekedegi qarsylasy grýzııalyq Gýram Týshashvılıge qatysty da pikirin bildirip, aldaǵy josparymen bólisti.
«Fınaldyq beldesý týraly aıtar bolsam, Gýram álemdi dzıýdodan baǵyndyryp júrgen balýan. Osydan bir jyl buryn eki ret kezdesken bolatynbyz. Ózi jas balýan. Álemdegi aldyńǵy qatarly balýandardyń biri. Birinshisinde Shymkent qalasynda ótken úlken týrnırde óz qateligimnen jeńilip qalǵan edim. Sodan keıin Qyzylordada ótken jarysta men utqan bolatynmyn. Búgin fınalda Alla qoldap, jeńis maǵan buıyryp tur eken. Maqsatymdy iske asyrdym. Qazaq kúresine qatysyp kele jatqanyma 15 jyl boldy. Alty álem chempıonatyn tórt ret utqan bolatynmyn. Astanada kelesi aıdyń 27-sinde qazaq kúresinen álem chempıonaty bolady. Soǵan qatysamyn», - dep túıdi Aıbek.
