Aıbek Kópenov Aqtóbe oblysy Baıǵanın aýdanyna ákim boldy

Aqtóbe oblysy Baıǵanın aýdanynyń ákimi qyzmetine Aıbek Kópenov taǵaıyndaldy, dep habarlaıdy Kazinform.

Búgin Baıǵanın aýdanynda máslıhattyń kezekten tys segizinshi sessııasy ótti. Aqtóbe oblysynyń ákimi Ashat Shaharov aýdan basshysy laýazymyna Aıbek Kópenovtiń kandıdatýrasyn usyndy. Depýtattar bul usynysty qoldap, biraýyzdan kelisim berdi.

Aıbek Kópenov 1985 jyly Aqtóbe oblysynda dúnıege kelgen. 2007 jyly Aqtóbe memlekettik pedagogıka ınstıtýtyn, 2020 jyly Qazaq-Orys halyqaralyq ýnıversıtetin támamdaǵan.

Eńbek jolyn 2008 jyly Aqtóbe oblysynyń balalar quqyǵyn qorǵaý departamentiniń jetekshi mamany bolyp bastaǵan.

2009 – 2021 jyldary Aqtóbe oblysynyń ishki saıasat basqarmasynyń bas mamany, basqarma basshysy qyzmetterin atqardy. 

2021 – 2022 jyldary Aqtóbe qalasy ákiminiń orynbasary boldy.

2022 jyldyń qazan aıynan bastap búgingi kúnge deıin Aqtóbe qalasy Astana aýdanynyń ákimi laýazymyn oryndady. 

"Artylǵan jaýapkershiliktiń salmaǵyn sezinip otyrmyn. Osyǵan deıin jınaǵan azdy-kópti tájirıbem, biliktiligim bar. Depýtattardyń, eldiń qoıyp otyrǵan talap-tilekterin oryndaý úshin birigip jumys isteýge ýáde beremin. Baıǵanın – tarıhı, kıeli oryn. Birge jumys istep, ortaq mindetke jetem degen senimdemin", - dedi jańa taǵaıyndalǵan Aıbek Kópenov.