Aıbek Qalıev aıtystaǵy kezekti avtokóligin utty
QOSTANAI. QazAqparat - Qostanaı oblysy Amangeldi aýdanynda ótken respýblıkalyq aqyndar aıtysynyń bas júldesin Aıbek Qalıev jeńip aldy, dep habarlaıdy QazAqparat tilshisi.
Respýblıkalyq aqyndar aıtysy Amankeldi aýdanynyń 90 jyldyǵy qarsańynda ótti. Bul aıtystyń bas júldesine «Lada Granta» markaly avtokólik tigilgen bolatyn. Oǵan kásipker Múbarak Shaıahmetov demeýshi boldy.
Aqyndardyń ónerin elimizge belgili aqyndar: Jadyra Qutjanova, Álfııa Ormanshına, Hamıtbek Musabaevtar baǵalady. Sóz dodasyn aqyn Marǵulan Ospanov júrgizip otyrdy.
Qazylar alqasy ekinshi aınalymǵa 4 aqyndy shyǵardy. Nátıjesinde, 3-oryn qaraǵandylyq Aıtbaı Jumaǵulovqa buıyrdy. Qostanaıdan kelgen Saltanat Ótelbaeva 2-orynǵa ıe boldy. Al birinshi oryndy jeńip alǵan shymkenttik Qajymuqan Abzalovqa 500 000 teńgeniń serıfıkaty tapsyryldy.
«Búgingi sóz tartystyń mańyzy zor. Sebebi, bul aıtys elimizge tanymal tulǵalardy dúnıege ákelgen Amankeldi topyraǵynyń mereıtoıyna arnaldy. Onyń jaýapkershiligin jaqsy sezindik. Aıtyskerlerdiń qaı-qaısysy bolsa da, jaman óner kórsetken joq», - dedi aqyn Qajymuqan Abzalov agenttik tilshisine.
Aıtysta aldyna jan salmaı, bas júldeni ıelengen Aıbek Qalıevke avtokólik syıǵa tartyldy.
