Aıbek Imashev: Halyqaralyq dzıýdo federatsııasymen tabysty jumys istep jatyrmyz

ASTANA.KAZINFORM – Aldaǵy ýaqyttarda elimizde dzıýdo sportynan iri halyqaralyq jarystar ótedi. Bul týraly Qazaqstan dzıýdo federatsııasynyń atqarýshy dırektory Aıbek Imashev Kazinform tilshisine aıtyp berdi.

Aıbek Imashev Qazaqstan dzıýdo federatsııasy 2023 jyly Halyqaralyq dzıýdo federatsııasymen (IJF) tórt jyldyq kelisimshartqa qol qoıǵanyn eske saldy.

- Kelisimshartqa sáıkes, Qazaqstan 2026 jylǵa deıin Grand Slam serııasyndaǵy týrnırlerdi qabyldaıdy. Osyǵan deıin, elordamyzda dúbirli dodany eki ret tabysty ótkizdik,- dedi ol.

QR dzıýdo federatsııasynyń atqarýshy dırektorynyń aıtýynsha, elimizde aldaǵy ýaqyttada iri halyqaralyq týrnırler ótedi.

- Qazirgi ýaqytta biz Halyqaralyq dzıýdo federatsııasymen tyǵyz ári tabysty jumystar atqaryp jatyrmyz. Onyń aıqyn dáleli retinde, elimiz 2027 jylǵy álem chempıonatyn ótkizý quqyǵyna ıe boldy,- dep atap ótti atqarýshy dırektor.

Aıta keteıik, Búgin Astana qalasyndaǵy Rixos President qonaq úıinde Qazaqstan Barysy Grand Slam 2025 álemdik týrnırine arnalǵan baspasóz maslıhaty ótti. Sonymen qatar, dúbirli dodanyń jerebesi tartyldy.

Eske salsaq, 9-11 mamyr kúnderi J.Úshkempirov atyndaǵy jekpe-jek saraıynda dzıýdodan álemdik Qazaqstan Barysy Grand Slam týrnıri ótedi. Bul jarysqa 47 eldiń 400-den astam sportshysy, olardyń qatarynda 5 Olımpıada chempıony men júldegeri qatyspaq.