Aıbek Dádebaı TúrkPA Bas hatshysy Ramıl Gasanmen kezdesti
ASTANA. KAZINFORM – Quryltaı Tóraǵasy Aıbek Dádebaı Túrki memleketteri Parlamenttik assambleıasynyń (TúrkPA) Bas hatshysy Ramıl Gasandy qabyldady. Taraptar Quryltaı men TúrkPA arasyndaǵy yntymaqtastyqtyń basym baǵyttaryn talqylady.
Kezdesýde Aıbek Dádebaı tamyz aıynda ótken Quryltaı saılaýyndaǵy TúrkPA baqylaýshylar mıssııasynyń jumysyna rızashylyǵyn bildirdi. Sondaı-aq Quryltaı baýyrlas túrki elderiniń parlamentterimen tyǵyz qarym-qatynas jasaý dástúrin jalǵastyratynyn atap ótti.
– Túrki memleketteri arasyndaǵy yntymaqtastyq pen áriptestik baılanysqa Qazaqstan erekshe basymdyq beredi. Bul týraly Memleket basshysy Qasym-Jomart Toqaev únemi aıtyp júr. Biz – baýyrlas halyqpyz, tarıhymyz ben mádenıetimiz ortaq. Osy baılanystardy odan ári nyǵaıta túsýimiz kerek. Bizdiń elderimizdiń parlamentshileri muny jaqsy túsinip, túrki birligin nyǵaıtýǵa zor úles qosyp keledi. Bul rette TúrkPA-nyń túrki ıntegratsııasyndaǵy alatyn orny erekshe, – dedi Aıbek Dádebaı.
Ramıl Gasan Aıbek Dádebaıdy Quryltaı Tóraǵasy qyzmetine saılanýymen quttyqtap, parlamentterdiń memleketaralyq saıasatty júzege asyrýdaǵy róline toqtaldy.
TúrkPA Bas hatshysy Qazaqstanda júrgizilip jatqan reformalarǵa qatysty pikir bildirip, olardyń qoǵamnyń ál-aýqatyn arttyrýǵa jáne memleketaralyq qatynastardy damytýǵa yqpalyn atap ótti.
Kezdesýde Qazaqstannyń TúrkPA-ǵa tóraǵalyǵynyń aıaqtalýyna baılanysty máseleler de sóz boldy. Aıbek Dádebaı qazan aıynda Bishkekte ótetin Assambleıanyń XV jalpy otyrysynyń mańyzyn atap ótip, onyń nátıjeleri uıym aıasyndaǵy yntymaqtastyqty odan ári nyǵaıtýǵa serpin beretinine senim bildirdi.
Taraptar TúrkPA jumysy jáne parlamentaralyq baǵyttaǵy aldaǵy is-sharalarǵa qatysty birqatar uıymdastyrý máselesin de talqylady.
Aıta keteıik, 2025 jyly Astanada TúrkPA-nyń XIV jalpy otyrysy ótip, onyń qorytyndysy boıynsha Astana deklaratsııasy qabyldanǵan edi.
