Aıbek Dádebaı Quryltaıdyń aldaǵy mindeti týrasynda: alda qyrýar jumys kútip tur
ASTANA. KAZINFORM — Basty mindet — oń ózgerister nátıjesi halyqtyń kúndelikti ómirinen kórinis tabatyn, zań men tártip ornyqqan Ádiletti Qazaqstandy birge qurý isin jalǵastyrý. Bul týraly QR Quryltaıynyń tóraǵasy Aıbek Dádebaı málim etti.
— Maǵan zor senim artyp, kandıdatýramdy QR Quryltaıynyń tóraǵasy laýazymyna usynǵan Qasym-Jomart Kemeluly Toqaevqa shynaıy alǵysymdy bildiremin. Quryltaıdyń barsha depattaryna da qoldaǵany úshin rahmet aıtamyn. Bul — men úshin úlken mártebe ári tarıhı jaýapkershilik. Prezıdent búgin aldaǵy jumys baǵytymyzdy, naqty mindetterdi aıqyndap berdi. Elimizde júzege asyp jatqan reformalar men aýqymy bizden baıypty sheshimder men kásipqoılyqty jáne qajyrly eńbekti talap etedi. Sonymen qatar, ár zańnyń, ár sheshimniń artynda naqty maqsat tur. Ol — elimizdiń odan ári damýyn qamtamasyz etý, memlekettigimizdi nyǵaıtyp, azamattarymyzdyń ál-aýqatyn arttyrý. Bul jumystyń negizinde halqymyz jappaı qoldaǵan jańa Konstıtýtsııanyń qundylyqtary men qaǵıdattary jatýy tıis. Basty mindet — oń ózgerister nátıjesi halyqtyń kúndelikti ómirinen kórinis tabatyn, zań men tártip ornyqqan Ádiletti Qazaqstandy birge qurý isin jalǵastyrý, — dedi A. Dádebaı.
Osy oraıda ol Quryltaıǵa artylar júk pen jaýapkershilik óte salmaqty ekenin eske saldy.
— Biz halyqtyń joǵary senim mandatyna ıe boldyq. Sol senim jumysymyzdyń basty baǵdaryna jáne onyń nátıjesiniń negizgi ólshemine aınalýy tıis. Quryltaı elimizdiń odan ári jańǵyrýyna tyń serpin beretin, konstrýktıvti qoǵamdyq dıalogqa jol ashyp, jańa zamannyń syn-qaterlerine laıyqty jaýap usynatyn minberge aınalýy tıis. Osy turǵyda biz judyryqtaı jumylyp, alda turǵan mindetterdi abyroımen atqarýǵa bar kúsh-jigerimizdi salýǵa tıispiz. Alda qyrýar jumys kútip tur. Osy jaýapty joldy birge eńserimiz dep kámil senemin, — dedi Quryltaı tóraǵasy.
Buǵan deıin habarlanǵandaı, Aıbek Dádebaı Quryltaı tóraǵasy boldy.
