Aıbek Dádebaı Quryltaı tóraǵasy boldy
ASTANA. KAZINFORM — Búgin elordada birinshi sessııa ashylǵannan keıin QR Quryltaıynyń tóraǵasy laýazymyna Aıbek Dádebaı saılandy.
Buǵan deıin Memleket basshysy Qasym-Jomart Toqaev QR Quryltaıynyń tóraǵasy laýazymyna Aıbek Dádebaıdy usynǵanyn jazǵan edik.
— Konstıtýtsııaǵa sáıkes Quryltaı tóraǵasy jasyryn daýys berý arqyly saılanady. Jasyryn daýys berýge arnalǵan tizimge depýtat Dádebaı Aıbek Arqabaıuly engiziledi, — dedi Ortalyq saılaý komıssııasynyń tóraǵasy Nurlan Ábdirov Quryltaıdyń jalpy otyrysynda.
Bul rette atalǵan kandıdat jasyryn daýys berýge arnalǵan bıýlletenge engizildi. Depýtattar arasynan esep komıssııasy qurylyp, komıssııa daýys berý barysyn qadaǵalady. Osy oraıda 145 depýtattyń 144-i A. Dádebaıdyń kadıdatýrasyn qoldady.
Aıbek Dádebaı 2001 jyly Abylaı han atyndaǵy Qazaq halyqaralyq qatynastar jáne álem tilderi ýnıversıtetin támamdaǵan. 2003 jyly osy JOO-nyń magıstratýrasyn «aımaqtaný magıstri» mamandyǵy boıynsha aıaqtaǵan.
Sonymen qatar, 2001-2002 jyldary Qazaq halyqaralyq qatynastar jáne álem tilderi ýnıversıteti Halyqaralyq týrızm menedjmenti kafedrasynyń oqytýshysy boldy.
2008-2011 jyldary QR Parlamenti Senaty Apparatynyń Parlamentaralyq baılanystar jáne halyqaralyq yntymaqtastyq bóliminiń sarapshysy, QR Parlamentiniń Senaty Tóraǵasy kómekshisiniń mindetin atqarýshy.
2011-2013 jyldary QR BUU-daǵy Turaqty Ókildiginiń úshinshi hatshysy, attashe.
2013-2019 jyldary QR Parlamenti Senaty Tóraǵasynyń hatshylyǵy meńgerýshisiniń orynbasary, meńgerýshisi.
2019-2021 jyldary QR Prezıdenti Keńsesi bastyǵynyń orynbasary.
2021 jyldyń mamyry — 2022 jyldyń qańtar aralyǵynda QR Prezıdenti Іs basqarýshysynyń orynbasary.
2022 jyly QR Prezıdenti Іs basqarýshysy. 2024 jyly QR Prezıdenti Ákimshiliginiń Basshysy boldy.
Al 2026 jyldyń mamyr aıynan Aıbek Dádebaı «Ádilet» partııasynyń tóraǵasy bolyp saılandy.
