Aıbek Dádebaı «Ádilet» partııasynyń tóraǵasy bolyp saılandy
ASTANA. KAZINFORM — Astanada ótip jatqan «Ádilet» partııasynyń quryltaı sezinde partııa tóraǵasy bolyp Qazaqstan Respýblıkasy Prezıdenti Ákimshiliginiń burynǵy basshysy Aıbek Dádebaı saılandy.
Bul usynysty sezge qatysqan 1000-nan astam delegat biraýyzdan qoldap, daýys berdi.
Óz kezeginde Aıbek Dádebaı delegattarǵa kórsetilgen senim úshin alǵys aıtyp, qabyldanǵan sheshimdi úlken jaýapkershilik retinde qabyldaıtynyn jetkizdi.
— Bizdiń partııamyzdyń negizi zań ústemdigi men tártip qaǵıdattaryna qurylady. Halyqtyń zań ústemdigine degen senimi – memlekettiń basty resýrsy ári tiregi. Sondyqtan bizdiń negizgi mindetimiz – ádildikti jarııalaý ǵana emes, ony ortaq mádenıetimizdiń ajyramas bóligine ári kúndelikti ómirimizdiń shartyna aınaldyrý. Basqasha aıtqanda, Ádildik ulttyq sana men bolmystyń aıryqsha sıpatyna aınalýy tıis. Memleket basshysy Qasym-Jomart Toqaev óz nazaryn únemi dál osy baǵytqa aýdaryp keledi, — dedi Aıbek Dádebaı.
Sondaı-aq jıyn barysynda jańa saıası birlestiktiń Saıası keńesiniń quramy tanystyryldy. Belgili bolǵandaı, keńeske 30 adam engizilgen.
Olardyń qatarynda Aıbek Dádebaı, «Qazaqtelekom» AQ basqarma tóraǵasy Baǵdat Mýsın, Bala quqyqtary jónindegi ýákil Dınara Zákıeva, kásipker Andreı Lavrentev, «Ádil sóz» sóz bostandyǵyn qorǵaý halyqaralyq qorynyń jetekshisi Qarlyǵash Jamanqulova jáne ózge de qoǵam qaıratkerleri men sarapshylar bar.
Aıbek Dádebaı 2001 jyly Abylaı han atyndaǵy Qazaq halyqaralyq qatynastar jáne álem tilderi ýnıversıtetin támamdaǵan. 2003 jyly osy JOO-nyń magıstratýrasyn «aımaqtaný magıstri» mamandyǵy boıynsha aıaqtaǵan.
Sonymen qatar, 2001-2002 jyldary Qazaq halyqaralyq qatynastar jáne álem tilderi ýnıversıteti Halyqaralyq týrızm menedjmenti kafedrasynyń oqytýshysy boldy.
2008-2011 jyldary QR Parlamenti Senaty Apparatynyń Parlamentaralyq baılanystar jáne halyqaralyq yntymaqtastyq bóliminiń sarapshysy, QR Parlamentiniń Senaty Tóraǵasy kómekshisiniń mindetin atqarýshy.
2011-2013 jyldary QR BUU-daǵy Turaqty Ókildiginiń úshinshi hatshysy, attashe.
2013-2019 jyldary QR Parlamenti Senaty Tóraǵasynyń hatshylyǵy meńgerýshisiniń orynbasary, meńgerýshisi.
2019-2021 jyldary QR Prezıdenti Keńsesi bastyǵynyń orynbasary.
2021 jyldyń mamyry – 2022 jyldyń qańtar aralyǵynda QR Prezıdenti Іs basqarýshysynyń orynbasary.
2022 jyly QR Prezıdenti Іs basqarýshysy.
2024 jyly QR Prezıdenti Ákimshiliginiń Basshysy boldy.
Aıta keteıik, Astana «Ádilet» partııasynyń quryltaı sezi ótip jatyr.
Eske salsaq, 5 mamyrda Aıbek Dádebaı QR Prezıdenti Ákimshiliginiń Basshysy laýazymynan bosatyldy.
Onyń ornyna Roman Sklıar QR Prezıdenti Ákimshiliginiń Basshysy bolyp taǵaıyndaldy.
