Aıbatyr Jumaǵulov «Qazaqstan Turǵynúıqurylysjınaqbanki» AQ-nyń basqarma tóraǵasy qyzmetine taǵaıyndaldy

ASTANA. 17 qazan. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda «Báıterek» ulttyq basqarýshy holdıngi» AQ basqarma tóraǵasy Qýandyq Bıshimbaev «Qazaqstan Turǵynúıqurylysjınaqbanki» AQ basqarma tóraǵasy qyzmetine Aıbatyr Jumaǵulov taǵaıyndalǵandyǵyn málim etti.

Buǵan deıin ol holdıngtiń basqarýshy dırektory qyzmetin atqarǵan. Atap aıtqanda, «Qazaqstan Turǵynúıqurylysjınaqbanki» AQ burynǵy basqarma tóraıymy Nurbıbi Naýryzbaevanyń qyzmeti merziminen buryn toqtatyldy.

Esterińizge sala keteıik, 11 qazanda Elbasy Nursultan Nazarbaev QR Úkimetiniń keńeıtilgen otyrysynda birqatar syn-eskertýler men naqty tapsyrmalar bergen bolatyn. Sonymen qatar otyrys barysynda Prezıdent «Turǵynúıqurylysjınaqbanki» AQ basshylyǵyna ótkir syn aıtyp, Q. Bıshimbaevqa birqatar tapsyrmalar júktedi.

Memleket basshysynyń atap ótýinshe, atalǵan banktiń basshylyq qyzmetkerleri mıllıondaǵan teńge jalaqy ala otyryp, «Qoljetimdi baspana-2020» baǵdarlamasy aıasynda páterlerdi jeńildikpen satyp alǵan. «Maǵan jańa baspana tóraǵaǵa, onyń orynbasarlaryna, banktiń Almatydaǵy fılıalynyń dırektoryna, onyń aǵasyna, departament dırektoryna, onyń apaıyna bólingendigi týraly anyqtama berdi. Banktiń basqarýshy dırektory, onyń aǵasy, sondaı-aq keıinnen páterdi úshinshi tulǵaǵa syıǵa tartqan uly baspana alǵan. Men ýaqytymdy shyǵyndap mynaý dalbasany ister is bolmaǵannan keıin tizbektep atap otyrǵanym joq. Men qarap otyrmyn, banktiń jeńildikpen páter alǵan 20-dan astam qyzmetkeri bar. Biz sonda bankti onyń qyzmetkerleri úshin qurdyq pa?» - dedi Elbasy.

Búgingi baspasóz máslıhaty barysynda Q. Bıshimbaev banktiń basshy qyzmetkerleri alǵan páterlerin erikti túrde qaıtarý máselesi qarastyrylyp jatqandyǵyn málimdedi.