«Aıbalta-2025»: rotalyq taktıkalyq oqý-jattyǵýy jalpyáskerı daıyndyq kezeńin aıaqtady
ASTANA. KAZINFORM – Mańǵystaý oblysynda ótken jalpyáskerı daıarlyqtyń sońǵy kezeńi jaýyngerlik atysty qamtyǵan taktıkalyq manevrler boldy. Bul týraly Qorǵanys mınıstrliginiń baspasóz qyzmeti habarlady.
Áskerı qyzmetshiler rotalyq taktıkalyq oqý-jattyǵýy kezinde urysqa barynsha jaqyn jaǵdaılardaǵy tapsyrmalar keshenin pysyqtady.
Áskerı bólimsheler shartty qarsylastyń jappaı shabýylyn toıtaryp, qorǵanysta utymdy áreket etýmen qatar, qarsy shabýylǵa shyǵyp, shabýyldyń nátıjesin odan ári damytty. Manevr jasaý qabileti, ınjenerlik bógetterdi qoldaný, alǵy shepke dál oq atý jáne artıllerııalyq qoldaýdy tıimdi uıymdastyrýǵa aıryqsha mán berildi.
Oqý-jattyǵýǵa qatysýshylar ózderiniń daıyndyq deńgeıin, qarý-jaraq pen tehnıkany sheber paıdalanýyn, sondaı-aq urystaǵy úılesimdi is-qımyldaryn joǵary dárejede kórsete bildi. Komandalyq quram áskerı qyzmetshilerdiń is-qımylyna oń baǵa berdi.
«Aıbalta-2025» oqý-jattyǵýy – Qazaqstan Qarýly kúshteriniń jaýyngerlik daıyndyǵyn jetildirý men eldiń qorǵanys qabiletin arttyrýdaǵy mańyzdy qadamdardyń biri boldy.
Aıta ketelik Qarýly kúshterdiń áskerı qyzmetshisi 600 shaqyrymdyq sýpermarafondy eńserdi.