Aıajan Sydyq bokstan álem chempıony atandy

Qazaqstandyq boksshy Aıajan Sydyq Armenııanyń Erevan qalasynda ótip jatqan jasóspirimder arasyndaǵy 2023 jylǵy álem chempıonatynyń fınalynda óner kórsetti. Kazinform bul týraly Sports.kz-ke silteme jasap habarlaıdy.

54 kelige deıingi salmaq sanatyndaǵy aqtyq kezeńde A.Sydyq Úndistan ókili Amısha Kerkettamen kezdesti. Jekpe-jek tóreshilerdiń biraýyzdy sheshimimen qazaqstandyq boksshynyń paıdasyna, 5:0 esebimen aıaqtaldy.

Osylaısha, Aıajan Sydyq álem birinshiliginiń altyn júldesin qanjyǵasyna baılady. Al onyń qarsylasy «kúmiske» qanaǵat etti.

Qosa keteıik, Qazaqstan quramasy úshin bul atalǵan týrnırdegi alǵashqy altyn medal.

Buǵan deıin habarlaǵanymyzdaı, fınalda sondaı-aq, qyzdar arasynda – Tolǵanaı Qasymhan (60 kg), Aısulý Muhıt (66 kg), uldar arasynda – Nursaly Tileýbek (54 kg) rıngke shyǵady.

Fınal jekpe-jekteri 3 jáne 4 jeltoqsanǵa josparlanǵan.