Aıazǵa baılanysty Tarazda oqýshylar sabaqqa barmaıdy
TARAZ. QazAqparat - Aýa raıynyń qolaısyzdyǵyna baılanysty Taraz qalasynda 1-4 synyp oqýshylaryna sabaq bolmaıdy, dep habarlaıdy QazAqparat tilshisi.
Jambyl oblysy Bilim basqarmasynyń málimetinshe, buǵan deıin Moıynqum men Sarysý aýdandarynda ǵana bastaýysh synyp oqýshylary úshin sabaq bolmaıtyny habarlanǵan.
«Qazgıdromet» RMK-nyń fılıalynda atap ótkendeı, Jambyl oblysynda 26-27 jáne 29-30 qańtar kúnderi aıaz qaharyna minedi. Jambyl oblysy úshin mınýs 30 gradýs aıazdar «qatty» sanatyna jatady jáne «qaýipti jaǵdaı» bolyp belgilenedi. Al mınýs 35 gradýs aıazdyń sanaty - «óte qatty» jáne «tabıǵı gıdrometeorologııalyq jaǵdaı» retinde belgilenedi. Jel qatty soǵatyn Shoqpaq, Hantaý, Qordaı asýlarynda qaýip ásirese joǵary bolmaq.
Sınoptıkterdiń aldyn ala boljamy boıynsha, óńirde aqpan aıynda da aıazdar soǵyp, qar jaýady. Temperatýra aıdyń alǵashqy kúnderi túnde mınýs 15-20-ǵa deıin tómendeıdi.
