Aıazǵa baılanysty Astanada kólikti otaldyrý qyzmetteri qymbattady
ASTANA. QazAqparat - Saryshunaq aıaz saldarynan Astanada kólikti otaldyrý qyzmetterine suranys kúrt artty, dep habarlaıdy QazAqparat.
Atalǵan qyzmet úshin qazirgi kezde elordadaǵy tehnıkalyq qyzmet kórsetý oryndarynda shamamen 20 myń teńge surap otyr. Osy oraıda «Avto24» TQKS mamanynyń sózine qaraǵanda, sońǵy eki eki kúnde kólikterin otaldyryp berý kómegine júgingen adamdar sany kúrt artýda.
«Biz qala turǵyndarynan tapsyrys alyp úlgermeı jatyrmyz. Ózderińiz baıqaǵandaı, mınýs 40 gradýstyq saryshunaq aıazda kólikterdiń otalýy qıyndaý», - dedi atalǵan stansanyń Ardaq esimdi mamany «QazAqparat» tilshisine bergen suhbatynda.
Júrgizýshilerdiń aıtýynsha, aıazǵa deıin bul qyzmettiń túri ortasha alǵanda 5 myń teńge somasynda bolǵan, alaıda tapsyrys berýshiler san kóbeıgennen keıin, osy qyzmetke baǵa da sharyqtady.
Keıbir tehnıkalyq qyzmet kórsetý stansalary kóliktiń qozǵaltqyshyn jylytyp, otaldyryp berýge 10 myń teńge surap otyr. Biraq ta stansa mamandary bos bolmaǵandyqtan, olarǵa telefon shalý múmkin bolmaı turǵan kórinedi.
«Astana turǵyndarynyń kóbisi kólikterin saýda ortalyqtary astyndaǵy jyly turaqtarǵa qoıdy. Bul rette bir túnge turaqty paıdalanǵan úshin olar 1700-2000 teńge aralyǵynda tóledi. Sondyqtan ortalyqtardaǵy turaqtarda oryn bolmady», - dedi qala turǵyny Bıbigúl Tanenova.
Tájirıbeli júrgizýshi Beıbit Sultanovtyń atap ótýinshe, kútim kórgen avtokólik kez kelgen aıazda ekinshi talpynystan otalýy tıis.
«Eger de kólik otalmasa, onda onyń bólshekteriniń aqaýy bar degendi ańǵartady. Eń mańyzdy degen tetikterin ýaqtyly aýystyrmasa nemese akkýmýlıatory otyryp qalsa, onda kólik aıazdy kúnderi júrmeı qalatyny anyq. Negizi, akkýmýlıator shamamen 3 jyl merzimde durys qyzmet etip beredi. Mysaly, búgin kóligimniń kúdik týǵyzǵan bólshekterin aýystyryp jatyrmyn, sondyqtan aldaǵy sýyqtarda da avtokóligim otalady degen úmittemin», - dedi ol.
