Aıazǵa baılanysty Qostanaı men Pavlodar oblystarynda mektepter qashyqtan oqytýǵa kóshti

ASTANA. KAZINFORM — Aýa temperatýrasynyń kúrt tómendeýi men qolaısyz aýa raıyna baılanysty Qostanaı oblysynyń birqatar qalalary men aýdandarynda oqýshylar qashyqtan oqytý formatyna aýystyryldy. 

Beıimbet Maılın aýdanynda aýa temperatýrasy –30…–33°C aralyǵynda bolǵandyqtan, 1–11 synyp oqýshylarynyń barlyǵy onlaın oqytýǵa kóshirildi.

Qostanaı qalasynda 1–9 synyp oqýshylary qashyqtan oqıdy.

Rýdnyı qalasynda 0–9 synyp oqýshylary (birinshi aýysym) onlaın formatta bilim alady.

Jitiqara aýdanynda aýa temperatýrasy –26,1°C, jeldiń jyldamdyǵy 5 m/s bolǵan jaǵdaıda, KPP jáne 1–7 synyp oqýshylary (birinshi aýysym) qashyqtan oqytýǵa aýystyryldy.

Altynsarın aýdanynda –27°C aıazǵa baılanysty 0–9 synyp oqýshylary (birinshi aýysym) onlaın oqıdy.

Qarabalyq aýdanynda aýa temperatýrasy –29°C, jel 12 m/s bolǵandyqtan, KPP jáne 1–11 synyp oqýshylary (birinshi aýysym) qashyqtan oqytýǵa kóshirildi.

Lısakovsk qalasynda –27°C aıaz jáne 5 m/s jel kezinde 1–9 synyp oqýshylary (birinshi aýysym) onlaın formatta bilim alady.

Áýlıekól aýdanynda KPP jáne 1–9 synyp oqýshylary (birinshi aýysym) qashyqtan oqytýǵa aýystyryldy.

Meńdiqara aýdanynda aýa temperatýrasy –31…–34°C, jel 5 m/s bolǵandyqtan, KPP jáne 1–11 synyp oqýshylary (birinshi aýysym) onlaın oqıdy.

Uzynkól aýdanynda KPP jáne 1–11 synyp oqýshylary (birinshi aýysym) qashyqtan oqytý formatyna kóshirildi.

Bul sheshim balalardyń qaýipsizdigin qamtamasyz etý maqsatynda qabyldandy. Ata-analar men oqýshylarǵa bilim bólimderi men mektep ákimshilikteriniń resmı habarlamalaryn qadaǵalaý usynylady.

Sonymen qatar, 2026 jylǵy 14 qańtarda Pavlodar, Ekibastuz jáne Aqsý qalalaryndaǵy barlyq mektepterde birinshi aýysymdaǵy (mektepaldy daıarlyq toptary men 1–9 synyptar) sabaqtar qashyqtan formatta ótedi. Oqýshylardy tasymaldaý toqtatyldy. Aýa temperatýrasy –29°C, jeldiń jyldamdyǵy — 3 m/s.

Buǵan deıin Astana qalasynda da birinshi aýysym oqýshylary onlaın oqytýǵa kóshirilgeni habarlanǵan bolatyn.