Aıazdyń beti endigi aptada synady

Meteorologtardyń habarlaýynsha, elordada apta sońyna deıin kún sýyq bolady, túnde -30;-35°C, kúndiz -23;-30°C aıaz turady. Erteń elordada kún bultty bolady, azdap qar jaýady. Soltústik-shyǵystan, shyǵystan 9-14 m/s jyldamdyqpen jel soǵady. Túnde aýa temperatýrasy -30;-32°C, kúndiz -24;-26°C. 31 qańtarda kún ala bultty, jaýyn-shashynsyz bolady. Soltústik-shyǵystan 9-14 m/s jyldamdyqpen jel soǵady. Túnde aýa temperatýrasy -33;-35°S, kúndiz -28;-30°C. «Aıazdy kún raıy 2 aqpanǵa deıin saqtalady. Sodan keıin aýa temperatýrasy -20;-25°C, túnde -30;-35°C deıin kóterilýi yqtımal», - dedi astana.kz saıtyna «Qazgıdromet» RMK. Aıta keteıik, birneshe kúnnen beri qatty aıaz saldarynan elordalyq mektepterde sabaq ótkizilmeı keledi. Búgin birinshi aýysymdaǵy 1-11 synyp oqýshylary men kolledjderdiń 1,2 kýrs stýdentteri úshin sabaq ótkizilgen joq. Ekinshi aýysymda oqıtyn 1-4 synyp oqýshylary da mektepke barmaıdy. Eske salaıyq, oqý jylynyń qysqy kezeńinde oqýshylardyń qaýipsizdigi men densaýlyǵyn saqtaý maqsatynda 1-4 synyptarda aýanyń temperatýrasy -25 gradýs jáne odan tómen bolǵanda; 1-9 synyptarda aýanyń temperatýrasy -30 gradýstan tómen bolǵanda; 1-11(12) synyptarda, kásiptik lıtseılerde, kolledjderde (1-2 kýrs oqýshylary úshin) - 35 gradýstan tómen bolǵanda Astana qalasy ákimdigimen kelisilgen bilim uıymdarynda sabaqty toqtatýdyń parametrleri belgilengen bolatyn.