Aıazdy kúni úsip qalmaýdyń amaly qandaı – TJM birqatar keńes usynady

ASTANA. QazAqparat – Aıazdy kúni úsip qalmaýdyń amaldary bar. Ondaı jaǵdaıǵa tap bolsańyz, ne isteý qajettigin bilgen jón. Tótenshe jaǵdaılar mınıstrligi birqatar keńes usynady, dep habarlaıdy QazAqparat vedomstvonyń baspasóz qyzmetine silteme jasap.

TJM málim etkendeı, úsip qalmaýdyń qarapaıym erejeleri bar.

Birinshiden, alkogoldi ishimdik ishpeńiz. Mas adamnyń denesi tez tońazıdy jáne úsik belgilerin baıqamaı qalady.

Ekinshiden, sýyqta temeki shekpeńiz. Temeki shegý adamnyń perıferııalyq qan aınalymyn azaıtady, aıaq-qoldy álsiretedi.

Úshinshiden, keń kıim kıińiz. Bul qannyń qalypty aınalymyna yqpal etedi. Tórtinshiden, syrtqy kıim mindetti túrde sý ótkizbeıtin bolýy kerek. Sondaı-aq, qolǵapsyz, malaqaısyz jáne sharfsyz aıazǵa shyqpańyz.

Besinshiden, jeldi, sýyq kúni syrtqa shyqpas buryn, deneniń ashyq jerlerin arnaıy kremmen maılańyz.

Sýyqta uzaq serýendeý úshin ózińizben birge aýystyratyn bir-eki shulyq, qolǵap jáne ystyq shaı termosyn alyp júrgen jón. Serýendeý kezinde siz tońǵanyńyzdy sezseńiz, jylyný úshin múmkindiginshe kez kelgen jyly jerge, atap aıtqanda dúkenge, dámhanaǵa, úıge kirińiz. Aıazda uzaq serýendegennen keıin úıge oralǵanda, aıaq-qoldyń, arqanyń, qulaqtyń, murynnyń jáne t.b. úsip qalmaǵanyna kóz jetkizińiz.

Eger sizdiń kóligińiz eldi mekennen alys nemese beıtanys jerde toqtap qalsa, kólikte qalyp, telefon arqyly kómek suraǵanyńyz jón nemese jolda basqa kóliktiń ótýin kútken durys.

Jelden qorǵanyńyz, jelde úsik shalý yqtımaldyǵy áldeqaıda joǵary.

Balalarda deneniń jylý rettelýi áli tolyq qalyptaspaǵanyn este ustaǵan jón. Sondyqtan, balany aıazdy kúni dalaǵa serýendeýge jibergende, oǵan ár 15-20 mınýt saıyn jyly jerge kirý kerek ekenin eskertýdi umytpańyz.

Eger kómek qajet bolsa, 112 nómirine qońyraý shalyńyz.