Aıazdy kúnderi sabaqtyń toqtatylýy oqýshylardyń bilimine keri áser etpeıdi
ASTANA. QazAqparat - Birneshe kúnnen beri aıaz qysyp, Saryarqanyń saryshunaq borany minez kórsetip tur. Qala syrtyn aıtpaǵanda, qalanyń ishindegi qozǵalys ta báseńsigen. Mundaı bet shydatpaıtyn sýyqta mektep oqýshylary úshin sabaq toqtatylýda. Degenmen olar mektep baǵdarlamasynan qalmaıdy, dep habarlady elordanyń resmı saıtynan.
"Kúnniń sýytýyna baılanysty jylda mektepterde sabaq toqtatylady. Ol kezderi muǵalimderdiń sabaq josparyna ózgertýler engiziledi. Óıtkeni biz ótkizip alǵan baǵdarlamalardy qosymsha sabaqtar arqyly nemese demalys kezinde oqyta almaımyz. Sondyqtan sabaq bastalǵanda kúnine eki taqyryptan ótip, baǵdarlamany ıgerýge tyrysamyz", - deıdi Astana qalasy Bilim basqarmasy bóliminiń basshysy Botagóz Júnisova.
Bir aıta ketetini, muǵalimder balaǵa salmaq kelmeýin de eskerip jatyr. Al, mektepten tys bilim alam deýshiler ınternet arqyly tapsyrma alyp, jeke daıyndala alady. «Qazgıdromet» RMK boljamynsha elordadaǵy aıaz 2 aqpanǵa deıin saqtalady.
