Aıaz, tuman: 17 qazanǵa jasalǵan kún raıynyń boljamy

ASTANA. KAZINFORM — «Qazgıdromet» RMK 17 qazan kúnine arnalǵan aýa raıy boljamyn jarııalady. 

Sınoptıkterdiń boljaýynsha, keń aýqymdy antıtsıklon áli de respýblıkamyzdyń kóp bóligine óz áserin tıgizetin bolady. Osyǵan oraı, elimizdiń biraz aımaǵynda jaýyn-shashynsyz, ashyq aýa raıy saqtalady. Tek batysta jáne soltústik-batysta atmosferalyq frontaldy bólikter áserinen jańbyr men qar jaýady.

Ádettegideı, respýblıka boıynsha jel kúsheıedi. Al batysta tuman bolady.

Túnde Jetisý oblysynda 4-9 gradýs úsik júredi. Sondaı-aq Almaty oblysynyń soltústiginde, ońtústiginde 1-6 gradýs aıaz bolady.

Mańǵystaý oblysynda, Atyraý oblysynyń soltústik-shyǵysynda joǵary órt qaýpi kútiledi.

Aqtóbe oblysynyń ońtústiginde, soltústiginde, Jambyl oblysynyń ortalyǵynda, Qyzylorda oblysynyń soltústiginde, ortalyǵynda joǵary órt qaýpi saqtalady.

Almaty oblysynyń batysynda, Qostanaı jáne Aqmola oblystarynyń ońtústik-batysynda da joǵary órt qaýpi bar. 

Mundaı joramal Ulytaý oblysynyń shyǵysynda, ortalyǵynda jáne Abaı oblysynyń ońtústiginde de boljanǵan. 

Qyzylorda, Túrkistan oblystary men, Atyraý oblysynyń soltústiginde, ońtústiginde, shyǵysynda tótenshe órt qaýpi bar.

Sondaı-aq Jambyl oblysynyń batysynda, soltústiginde, Aqtóbe oblysynyń batysynda, soltústik-shyǵysynda, ortalyǵynda da tótenshe órt qaýpi boljanǵan.

Almaty oblysynyń soltústiginde, Qostanaı, Batys Qazaqstan oblystarynyń ońtústiginde, Ulytaý oblysynyń ońtústiginde tótenshe órt qaýpi saqtalady.

Aıta keteıik, búgin 4 qalada aýa sapasy nasharlaıdy.