Aıaz, kóktaıǵaq: SQO-da jyl bastalǵaly 2,5 myńǵa jýyq adam jaraqat pýnktine júgindi
PETROPAVL. QazAqparat – Soltústik Qazaqstan oblysynda bıyl 2,5 myńǵa jýyq adam jaraqat pýnktine qaraldy. Olardyń basym bóligi kóktaıǵaqtan zardap shekkender jáne úsik alǵandar, dep habarlaıdy QazAqparat tilshisi.
Petropavl qalalyq kópbeıindi jedel medıtsınalyq járdem aýrýhanasynyń jaraqat pýnktine táýligine orta eseppen 50 shaqty adam qaralady. Emdeý mekemesi qala turǵyndaryn ǵana emes, aýyldyqtardy da qabyldaıdy. Dárigerlerden kómek surap keletinderdiń basym bóligi kóshede kele jatyp qulap qol-aıaǵyn syndyrǵandar. Jaraqaty jeńil bolsa, mamandar gıps salyp, emdelýge úılerine jiberedi.
«Jaraqatpen keletinder sany qysta kóbirek. Qysqy maýsymda negizinen tobyǵy synyp keledi. Aýyr jaraqat – jambas býyny, bilek súıekteri synatyndar bar. Mundaıda operatsııa jasalady. Ádette synyq ornyna tússe gıps salyp, úıge emdelýshge jiberemiz. 5-8 aptadan keıin gıpsin sheshemiz», - deıdi jaraqat pýnktiniń meńgerýshisi Valerıı Grıbashov.
Aýyr jaraqatpen túskender travmatologııalyq bólimshege jatqyzylady. Munda 14 dáriger qyzmet etedi.
«Úsikpen túskenderdiń basym bóligi mas bolady. Olardy aman alyp qalý úshin ampýtatsııa jasap, qoldarynyń basyn, tabandaryn alyp tastaımyz. Ókinishke oraı úsikpen túsetinderdiń qatary jyldan jylǵa artyp keledi. Qys maýsymynda eń keminde 40 shaqty adamdy qabyldaımyz. Buryn negizinen qańǵybastar bolatyn, al qazir spırttik ishimdik ishkender nemese jaraqat alyp, dalada jatyp qalǵandar túsedi», - deıdi Nıkos Leonov.
Bir jylda 2 myń syrqat bólimshege jatqyzylyp emdeledi, onyń 1,5 myńyna operatsııalar jasalady.
«Oblystaǵy jalǵyz bólimshe. Jambas, tize býynyn aýystyramyz. Jylyna osyndaı 150-ge jýyq ota jasalady. Budan basqa da kóptegen otalarymyz bar. Bıyldan bastap valgýs deformatsııasyna da ota jasaıtyn boldyq. Osyndaı 10 operatsııa isteldi. Mundaı qymbat otalardyń barlyǵy mindetti áleýmettik medıtsınalyq saqtandyrý aıasynda tegin júrgiziledi», - travmatologııalyq bólimshe meńgerýshisi Nıkos Leonov.
