Aıaz, kóktaıǵaq: Astananyń bas travmatology turǵyndardy saq bolýǵa shaqyrdy

ASTANA. KAZINFORM – Elordada aýa raıynyń kúrt nasharlaýy baıqalýda, aıaz býyp, boran soǵady jáne jel kúsheıedi dep boljaıdy mamandar. Bas shtattan tys travmatolog, basqarma mamany Alekseı Solod qala turǵyndaryn qaýipsizdik sharalaryn saqtaýǵa jáne kóshede saq bolýǵa shaqyrady.

Mamannyń aıtýynsha, eń aldymen aıaq kıim tańdaýǵa erekshe kóńil bólý qajet. Kóktaıǵaq kezinde bıik óksheli aıaq kıimnen bas tartyp, tabany kedir-budyr, taımaıtyn aıaq kıim kıgen jón.

Sondaı-aq úıden shyǵý ýaqytyn aldyn ala josparlap, asyqpaı qozǵalý mańyzdy. Qysqa qadam jasap júrý, qoldy qaltaǵa salmaý jáne múmkindiginshe aýyr sómkelerdi ustamaý tepe-teńdikti saqtaýǵa kómektesedi.

Qart adamdarǵa rezeńke nemese temir ushy bar taıaq qoldaný usynylady. Qosymsha tirek retinde shańǵy taıaǵyn paıdalanýǵa da bolady.

Muz qatqan jáne jaryqtandyrylmaǵan jol ýchaskelerinen aýlaq bolǵan durys. Eger qulaýdyń aldyn alý múmkin bolmasa, deneni jınaqtap, tizeni sál búgip, arqamen emes, janymen qulaý aýyr jaraqattardyń aldyn alýǵa kómektesedi.

Qulaǵannan keıin birden turýǵa asyqpaǵan jón. Eger bas aınalý nemese qatty aýyrsyný sezilse, aınaladaǵy adamdardan kómek suraý qajet.

Aýyr jaraqat alǵan jaǵdaıda mindetti túrde medıtsınalyq uıymǵa júginip, bilikti medıtsınalyq kómek alý kerek.

Medıtsına qyzmetkerleri ata-analarǵa balalarǵa qys mezgilinde kóshede qaýipsiz júrip-turý erejelerin únemi eskertip otyrý qajettigin de eske salady.

Aıta keteıik, aldaǵy ýaqytta 28 gradýs aıaz bolatyny habarlandy.