Aıaz qandaı jaǵdaıda óziniń naqty temperatýrasynan sýyq bolyp seziledi?
ASTANA. QazAqparat - «Qazgıdromet» RMK mamandary «QazAqparat» HAA tilshisine kóptiń aýzynda júrgen «sezilý» temperatýrasynyń mán-maǵynasyn túsindirip berdi, dep habarlaıdy «QazAqparat» HAA tilshisi.
«Termometr -34 gradýsty kórsetkenimen, kúnniń sýyqtyǵy -40 gradýs sekildi seziledi» degen mazmundaǵy áńgime qazir kóptiń aýzynda júr.
««Seziledi» nemese áserli temperatýra - meteoelementter kesheniniń adamǵa áserin kórsetetin (aýa temperatýrasy men jel jyldamdyǵy), ekeýi de bir bıometeorologııalyq ındeks. Matematıkalyq formýlalardyń arqasynda adamnyń temperatýraǵa kóleńkeli tusta ketip bara jatqandaǵy áserin eseptep shyǵarýǵa bolady», - deıdi sınoptıkter.
Osylaısha, 22 qańtar kúni Astanada tańǵy saǵat alty shamasynda aýa temperatýrasynyń kórsetkishi mınýs 34,4 gradýs bolyp, jel sekýndyna 7 metr jyldamdyqpen soqqan. Osy eki parametrdi qoldana otyryp, sınoptıkter aıazdyń mınýs 58,4 gradýs sekildi seziletinin eseptep shyǵarǵan. Búgin tańǵy saǵat alty kezinde aýa temperatýrasy mınýs 37,5 gradýsty, sekýndyna 6 metr jel jyldamdyqty kórsetken. Temperatýra 55,5 gradýs sekildi sezilgen.
TJ komıteti dymqyl kúıde, jeldiń qatty soǵyp turǵan shaǵynda adam sý kıimmen turǵan jaǵdaıda aýa temperatýrasy nóldi kórsetip tursa da, kisiniń úsikke shaldyǵýy múmkin ekenin eskertedi. Eger adam ash nemese sharshańqy, syrqat nemese mas bolsa, úsip qalý qaýpi asqyna túsedi.
Tinniń (tkan) úsý deńgeıi ártúrli. Alǵashqy deńgeıde dene qyzaryp, dombyǵyp isinip ketedi. Ekinshi kezeńinde denede qabyrshaq paıda bolsa, úshinshi kezeńinde teri jansyzdanady. Tórtinshi kezeńde adamnyń dene músheleri, máselen saýsaqtary jansyzdanady.
Mamandardyń aıtýynsha, úsikten zardap shekken adamdy birden jylytýǵa bolmaıdy. Mysaly, ondaı adamdy jyly vannaǵa nemese grelkaǵa, otqa jaqyndatpaǵan abzal. Sebebi, mundaı jaǵdaıda zaqymdalǵan tinderge birden jylý jetip, qanǵa ottegi barmaı qalýy yqtımal. Munyń arty ınfektsııanyń paıda bolýyna ákep soǵady. Adamdy jylytý úshin alkogol ishkizýdiń de zııany barshylyq.
Tońyp qalǵan adamnyń qoly nemese aıaǵyn bappen óz qolyńyzben nemese shashaqty moıynoraǵyshpen ysqylaǵan jón. Qolǵapty sheship, qoldy úrlep jylytyp, óksheni joǵarydan tómenge qaraı ysqylaǵan durys.
Adamdy qatty úsik shalǵanda (esinen tanyp qalsa) zaqym kelgen músheni jyly japqyshtarmen, múmkindik bolsa birneshe qabat maqtamen, dákemen orap tastaý kerek. Sodan keıin birden jyly orynǵa jetkizýge tyrysqan abzal. Eń durysy, dárigerdi birden shaqyrý kerek. Oralǵan aıaqty nemese qoldy dáriger kelgenshe sheshpegen durys.
Úsik shalsa, kez kelgen jyly sýsyndy (kofe, shaı, sút), aspırın nemese analgındi ishken durys. Sonymen birge noshpanyń eki tabletkasyn, korvaloldyń nemese valokordınniń 15-20 tamshysyn jutqan jón. Odan keıin tildiń astyna valıdoldyń nemese nıtroglıtserınniń tabletkasyn salyp qoıyp, dárigerdi kútý kerek.
