Aıaz, boran, kóktaıǵaq: qutqarýshylar kólikpen alys jolǵa shyqpaýǵa keńes berdi - ShQO
ShQO Tótenshe jaǵdaılar departamenti baspasóz qyzmetiniń málimetine súıensek, 17 qarashada kúndiz oblystyń ońtústiginde, soltústik-shyǵysynda qar jaýady. Óńirdiń batysy men soltústiginde boran jáne kóktaıǵaq bolady.
Ońtústik-shyǵystan ońtústik-batysqa aýysatyn jel jyldamdyǵy sekýndyna 15-20 metrge, kúndiz 25 metrge deıin jetedi. Óskemen jáne Semeı qalalarynda 17 qarashada burqasyn, kóktaıǵaq kútiledi.
«18 qarashada qar jaýyp, oblystyń ońtústiginde, soltústik-shyǵysynda boran soǵady. Jel jyldamdyǵy sekýndyna 30 metrden asýy múmkin. Al 19 qarashada aýa temperatýrasy kúrt tómendep túnde -17-22, oblystyń soltústik-shyǵysynda -25-ke deıin aıaz bolady. Sondyqtan aımaq turǵyndaryna aldaǵy kúnderde barlyq saqtyq sharalaryn qaperde ustaý qajettigin eskertemiz. Mundaı aýa-raıy jaǵdaıynda uzaq saparlardan bas tartqan jón», - delingen aqparatta.
