Aıaz, boran, kóktaıǵaq: 4 qarashadan bastap -13 gradýs aıaz túsedi

ASTANA.KAZINFORM — «Qazgıdromet» RMQ aldaǵy kúnderge arnalǵan aýa raıy boljamyn jarııalady.

Kúzdiń alǵashqy aılarynda Qazaqstan turǵyndaryn jyly aýa raıy qýantty. Alaıda, jaqsy aýa raıyn qamtamasyz etken antıtsıklon elimizdiń aýmaǵynan shyǵyp, óz ornyn soltústik tsıklonǵa berýde. Sýyq aýa massalarymen qorektenetin bul tsıklon elimizdiń aýmaǵy arqyly tez jyljyp, jańbyr túrinde jaýyn-shashyn ákeledi, keıin ol qarǵa ulasatyn bolady.

— 4 qarashadan bastap elimizdiń soltústik jáne shyǵys óńirlerinde qar, keı jerlerde kúshti qar, sondaı-aq ekpindi jel, boran jáne kóktaıǵaq kútiledi. Aýa temperatýrasy da birtindep tómendeıdi. Bul ásirese soltústik jáne shyǵys óńir turǵyndaryna seziledi: munda 4 qarashada túnde 5-13 gradýs aıaz, kúndiz 3-11 gradýs aıaz kútiledi, — delingen habarlamada.

Sýyq Qazaqstannyń ońtústigin de aınalyp ótpeıdi. 4 qarashada kútiletin jańbyr men qar túrindegi qatty jaýyn-shashynnan keıin aımaqta salqyndaý bastalyp, túnde aýa temperatýrasy 0-13 gradýs aıazǵa deıin tómendep, kúndiz 0-5 gradýs jyly shamasynda bolady.