Aıaz ata men Aqshaqar: mereke keıipkerlerin kásipke aınaldyrǵan jandar
ASTANA. KAZINFORM — Olar únemi ǵajaıyptardyń ortasynda júredi. Prezıdent teleradıokesheninniń Derekti kıno ortalyǵy daıyndaǵan fılmniń keıipkerleri, Aıaz ata men Aqshaqar mamandyqtyń qyr-syryn bólisip, qyzyǵy men shyjyǵyn aıtyp berdi, dep habarlaıdy Kazinform tilshisi.
Jańa jyl keıipkerine bastar jol
Rahat Qoshjanov kishkentaı kezinen ónerge jaqyn boldy, ózi de shyǵarmashyl ortada ósti.
Otbasylyq ansamblmen birge elimizdiń birneshe óńirin aralap, baıqaýǵa qatysty, mádenı sharada óner kórsetti.
— Meniń armanym estrada juldyzy bolý edi. Ózim bes jastan bastap urmaly aspapta oınadym. Keıin ásker qataryna shaqyrylyp, kolledjge oqýǵa tústim. Sol kezde tsırk jetekshisi «sen estrada bólimine bar, akterlik sheberlikti tańdasań tipti jaqsy» dep aıtty, — dep eske aldy keıipkerimiz.
Keıin ol teatrǵa jumysqa ornalasty. Rahat Qoshjanov arada shamamen bes jyl ótkende Aıaz Ata keıpine endi, sahnaǵa shyqty.
Sodan beri ol ár Jańa jyl merekesi saıyn Aıaz Ata rólin somdaıdy. Ár jyly balalardan qýat alyp, olarǵa úmit, qýanysh syılaıdy.
— Olar rııasyz senedi, máz bolady, kúledi. Sol kezde qýanysh syılaı alǵan ózime rıza bolamyn. Taza, jarqyn jandardyń janynda júrip, jańa bir álemge engendeı kúı keshesiń. Olardyń janynan únemi kúlip, qýanyp shyǵamyn, — dedi ol.
Al Ekaterına Dmıterchýk jyl saıyn Aqshaqardyń keıpine enedi. «Býratıno» qýyrshaqtar stýtsııasynda júrgende-aq teatr ónerine qyzyqty, tereń boılady.
Sóıtip ózi qalaǵan mamandyqqa qadam basty. Sahna tilin meńgerip, akterlik sheberligin shyńdady. Teatr álemi búginde ómiriniń ajyramas bir bólshegine aınaldy.
— Birde mektepte drama úıirmesi ashyldy. Al men ekonomıka salasyn tańdadym. Kolledjdi bitirgen soń shyǵarmashylyq baıqaýǵa qatysyp, teatr qoıylymdarynda óner kórsettim, bir topta oqyǵan dostarymdy biriktirip, olardy da sahnaǵa shyǵýǵa úgittedim, — dedi ol.
Sergeı Pýtre ómir boıy, 44 jyl KamAZ júrgizýshisi boldy. Keıin zeınetkerlik demalysqa shyqty. Bir kúni onyń janynan ótip bara jatqan beıtanys adam saqalyn kórip, Aıaz Ata bolýdy usynady.
— Men kóreıik dep, osynda keldim. Keldim, kelisim júrgizdik, jumysqa qosyldym. Men osy keıipke endim, osy rólde ómir súremin. Sebebi meni qalada kóbi tanıdy. Máselen men jazda dúkenge kirdim. Sol kezde eki kishkentaı qyz: «Santa!» dep júgirip keldi. Qalaı qushaqtamaı tura alasyń? — dep qyzyqty sátti bólisti Sergeı Pýtre.
Aıaz Ata bolý ońaı ma?
Álem ózgerip jatyr, keremetterge degen kózqaras ta burynǵydaı emes. Internetten bárin kórip, bilip otyr balalar. Alaıda keıipkerlerimiz jyl ótken saıyn jańa keıipke enip, balalarǵa senim men jańajyldyq ádemi ertegi syılaı biledi.
— Rejısserler men akterler daıyndalady, kóp eńbektenedi. Kishkentaı balalardy sendirip, áli de qýanysh syılap júrmiz. Al es bilgendi tań qaldyrý qıyn. Olar bárin kórip, bilip alǵan jáne shynaıy qabyldaı qoımaıdy, — dedi Rahat Koshjanov.
Sergeıa Pýtreniń aıtýynsha, týa bitti sal aýrýy bar erekshe balalarǵa tyńǵylyqty daıyndyq kerek.
— Olarǵa erekshe nazar aýdarý kerek. Ár balanyń senimine kirip, sóılesip, kóńil bólemiz. Erekshe balalardyń kóz janarynan qýanysh tabyn kórsek, biz de marqaıyp qalamyz, — dedi keıipkerimiz.
Balalar kózindegi qýanysh — baǵa jetpes syı
Keıipkerlerimizdiń árqaısysy óz jumysyn jaqsy kóredi, balalar boıyndaǵy qýanyshty sezedi. Jańa jylda Aıaz Ata men Aqshaqar mereke syılap, sıqyrǵa bóleıdi.
— Urpaqtan urpaqqa jalǵasqan dástúrdi saqtaǵan ata-analarǵa alǵys aıtamyz. Solardyń arqasynda ǵajaıyptar tolastaǵan emes. Aıaz Ata men Aqshaqar Jańa jyl saıyn úıge enip, keremet kóńil kúı men umytylmas ertegi syılaıdy, — dedi Ekaterına Dmıterchýk.
Onyń aıtýynsha, shapan men tájdi kıgen sátten-aq erekshe sezimge bólenedi. Tipti daıyndyq kezinde de bar kıimin kıip alady. Bul obrazǵa enip, shynaıy bolýǵa múmkindik beredi.
— Sıqyrly kıim rólge enýge kómektesedi. Jańa jylda aldyńa kelgen kishkentaı balalardyń ǵajaıypqa senetinin túsinesiń. Olar kútedi jáne kóńili aq, oıy taza balalarǵa shyn keıilmen qýanysh syılaısyń. Al ózgesiniń bári esiktiń artynda qalady, — dedi ol.
Úsh keıipkerimiz úshin de bul jaı mamandyq emes, adamdarǵa qýanysh syılaıtyn, olardy ǵajaıypqa sendirip, ádemi estelikter qaldyratyn ómirdiń bir bólshegi.