Aıaz aldynda ábiger: Qaraǵandyda jylý máselesi áli sheshilmeı tur

QARAǴANDY. KAZINFORM — Qaraǵandyda jylytý maýsymy resmı túrde 25 qyrkúıekte bastalǵanymen, kóptegen turǵyn áli kúnge deıin elektr jylytqyshtardy qoldanýǵa májbúr. 

Áleýmettik jelilerde narazylyq kóbeıip barady. «Jylý berildi» degen kommýnaldyq qyzmetterdiń málimdemesine qaramastan, batareıalar sýyq kúıinde qalyp otyr.

Jylytý maýsymy bastalǵaly bir aptadan astam ýaqyt ótse de, qaladaǵy barlyq kópqabatty úıge jylý tolyq jetken joq. Keıbir turǵyn úılerde batareıalar sál ǵana jylysa, endi birinde múlde muzdaı ekenin aıtyp jatyr. Sebepteri de ártúrli: bir jerde — jylý magıstralderindegi apat, ekinshi jerde — kommýnalshylardyń salǵyrttyǵy, al keıde turǵyn úı ıeleri kooperatıvteriniń jaýapsyzdyǵy sebep bolyp otyr.

Álıhanov kóshesinde aýqymdy apat boldy. Dıametri 426 mıllımetrlik qubyr jarylyp, kópqabatty on úı jylýsyz qaldy. Bul úılerge jylý ýaqytsha tómendetilgen rejımde berildi. Apattyq brıgadalar aqaýdy keshkisin joıǵanymen, sol túni aýa temperatýrasy mınýs jeti gradýsqa deıin tómendep, turǵyndar shaǵymdaryn qaıtadan jaýdyrdy.

Osyndaı jaǵdaılar qalanyń ózge aýdandarynda da baıqalady. Áleýmettik jeli qoldanýshylary Buqar jyraý dańǵyly men Gogol, Ermekov, Ábdirov, Pıchýgın, Erýbaev, Álıhanov kóshelerindegi úılerde, sondaı-aq «Gúlder-1», «Kógildir toǵandar», «Vostok-1» jáne № 13–17 shaǵynaýdandarynda batareıalardyń sýyq ekenin jazyp jatyr.

Eń kúrdeli ahýal Ermekov kóshesi, 21/1 mekenjaıyndaǵy aýlalarda tirkeldi. Munda kommýnalshylar jylýdy ýaqytsha berý úshin qubyrdy balalar alańynyń ústimen ashyq tartýǵa májbúr bolǵan. Biraq birneshe kúnnen keıin jumys toqtap, 8 qazanda turǵyndar birde-bir slesardi kórmegen.

Qazybek bı aýdany ákiminiń orynbasary Daýlet Mahanov muny ýaqytsha shara ekenin aıtty.

— Jylýdy keshiktirmeý úshin úıler ýaqytsha syzba boıynsha qosyldy. Kóktemde bul ýchaske tolyq aýystyrylyp, balalar alańy ınjenerlik jeliler ótpeıtin jerge kóshiriledi, — dedi ol.

Al «Teplotranzıt Qaraǵandy» JShS ókilderi qaladaǵy barlyq turǵyn úı men áleýmettik nysandarǵa jylý jetkizilgenin málimdedi.

— Kompanııa jylýdy úılerdiń syrtqy qabyrǵasyna deıin jetkizedi. Al ishki júıeniń durys jumys isteýine basqarýshy kompanııalar men turǵyndardyń ózderi jaýapty, — dep habarlady baspasóz qyzmeti.

«Qaraǵandy Energotsentr» dereginshe, qazirgi ýaqytta JEO-3-te bes qazan men alty týrbına jumys istep tur, taǵy eki qondyrǵy rezervte, al bireýi kúrdeli jóndeýden keıin synaqtan ótkizilip jatyr. Berilip jatqan temperatýra – 75 °C. JEO-1-de úsh bý qazandyǵy men úsh týrbına iske qosylǵan, munda temperatýra shamamen 65 °C deńgeıinde.

Energetıkterdiń aıtýynsha, kómir qory jetkilikti: JEO-3 qoımalarynda 500 myń tonnadan astam, JEO-1-de 90 myń tonnadan asa kómir qory bar. Bul kólem birneshe apta boıy turaqty jumys isteýge jetkilikti.

Aýa raıy múmkindik berip turǵan shaqta kommýnaldyq qyzmetterge barlyq aqaýlardy joıýdy keıinge qaldyrmaýǵa keńes beriledi. Óıtkeni dál osy kezeńde árbir úıge jylýdy jetkizýge úlgerýge bolady, al aıaz túsken kezde áleýmettik jeliler turǵyndardyń shaǵymyna tolyp ketpeýi kerek

Turǵyndarǵa da eskertý jasaldy: eger úılerinde jylý bolmasa, tek PIK nemese MIB qyzmetkerlerine ǵana emes, Qazybek bı jáne Álıhan Bókeıhan aýdandarynyń ákimdikterine, sondaı-aq qalalyq ákimdikke tikeleı habarlasý qajet.

Eske salsaq, 25 qyrkúıekte Qaraǵandy oblysynda jylytý maýsymynyń bastalý kestesi belgili bolǵan edi.