Aıaýlym Ámrenova: bul Olımpıada men úshin ózgeshe bolmaq
LIVINЬO.KAZINFORM — Italııanyń Lıvıno qalasynda ótetin frıstaıl-mogýl básekesi XXV qysqy Olımpıada oıyndaryndaǵy eń tartysty jarystardyń biri bolmaq.
Osy oraıda, Kazinform tilshisi Olımpıada qarsańynda daıyndyq júrgizip jatqan ulttyq qurama sportshylarymen kezdesip, ashylý saltanatynda Qazaqstannyń kók baıraǵyn alyp shyǵý mártebesine ıe bolǵan otandasymyz Aıaýlym Ámrenovamen tildesip qaıtty.
Sportshynyń aıtýynsha, daıyndyq joǵary deńgeıde ótip jatyr.
— Barlyǵy oıdaǵydaı. Aýa raıy men tabıǵaty, sonymen qatar kóńil kúıim de óte jaqsy. Alǵashqy Olımpıadaǵa jas kezimde qatystym, kóp nárseni sezine almadym. Ekinshi Olımpıada karantın kezeńine tuspa-tus keldi. Al bul joly ózimdi jaıly ári erkin sezinip júrmin, — dedi Aıaýlym.
Sondaı-aq ol bul Olımpıadanyń ózi úshin aıryqsha mánge ıe ekenin atap ótti.
— Elimizdiń kók baıraǵyn kóterip júrý árkimge buıyra bermeıtin úlken baqyt. Bul — men úshin zor mártebe. Tý ustaıtynymdy estigende alǵashynda senbeı qaldym. Degenmen osyndaı senim artylǵanyna sheksiz qýandym. Prezıdentimizben jolyqqan sáttegi ishki tolqynysymdy sózben jetkizý qıyn. Sondyqtan bul Olımpıadanyń men úshin orny bólek, — dedi sportshy.
Budan bólek, mogýlshy Olımpıada ótetin jarys trassasyna da toqtaldy.
— Trassanyń basty ereksheligi — uzyndyǵy 250 metrge jetedi. Bul aıtarlyqtaı qıyn. Sebebi halyqaralyq jarystarda eń uzyn trassalardyń ózi 236 metrden aspaıdy. Qardyń basym bóligi tabıǵı bolǵandyqtan, Shymbulaqpen salystyrǵanda jumsaqtaý. Sonymen qatar teńiz deńgeıinen 2 myń metr bıiktikte ornalasqandyqtan, ózimdi birshama jeńil sezindim, — dedi Aıaýlym Ámrenova.
Aıta keteıik, frıstaıl-mogýl sportynan Olımpıada oıyndarynda Qazaqstan atynan tórt sportshy óner kórsetedi. Olar — Pavel Kolmakov, Anastasııa Gorodko, ıÝlııa Galysheva jáne Aıaýlym Ámrenova.
Osyǵan deıin Qazaqstanda frıstaıl sportynyń damýy týraly jazǵan edik.