Aıatolla Álı Hameneı: AQSh Iranda memlekettik tóńkeris jasaýǵa qaýqarsyz
ASTANA. QazAqparat - Iran Islam Respýblıkasynyń 35 jyldyǵyna arnalǵan sózinde osy eldiń joǵarǵy kóshbasshysy aıatolla Álı Hameneı AQSh-tyń Iranǵa qatysty saıasatyn «qadaǵalaýshylyq jáne beımazalyq» dep baǵalady, dep jazady sheteldik BAQ.
«Amerıkalyq saıasatkerler Irandaǵy rejimdi aýystyrýdy tilemeıtindikterin málimdeıdi. Alaıda, bul jalǵan sóz. Eger de olar Iranda tóńkeris jasaýǵa qaýqarly bolsa, onda birer sátke de oılanbastan iske kiriser edi»,-dedi Hameneı.
Onyń sózine qaraǵanda, ırandyq ekonomıkany qalpyna keltirý sharalary halyqaralyq sanktsııalardy sheshýge emes, kerisinshe el ishindegi ınnovatsııalarǵa negizdelýi tıis. «Meniń Úkimetke berer keńesim: memlekettiń ishindegi sheksiz áleýetke ekpin jasańdar»,-dedi Irannyń joǵarǵy kóshbasshysy.
Hameneı eliniń ıadrolyq baǵdarlama aıasynda MAGATE-men jáne araǵaıyn altylyqpen júrgizilip jatqan kelissózder jaıynda atap ótpese de, Iran «jaýlarymen» iske kelgende óziniń ustanymdary negizinde kelisimge kelý sharalaryn ońtaıly atqarýy tıis ekenin atap ótti.
Iran men AQSh kóshbasshylary 1979 jyldan beri qandaı da bir kelissózder jasaǵan emes. Alaıda, 2013 jyldyń 27 qyrkúıeginde AQSh Prezıdenti Barak Obama men Iran Prezıdenti Hasan Rýhanı arasynda telefon arqyly áńgime boldy. Osydan keıin eki eldiń arasyndaǵy qarym-qatynasta seń qozǵala bastady.
