Aıanǵa aıtylǵan alǵys
ASTANA. 29 qyrkúıek. QazAqpaat - Keshe Premer-Mınıstr Serik Ahmetov Elbasy N.Nazarbaevtyń tapsyrmasy boıynsha Halyqaralyq Olımpıadalyq komıtettiń múshesi, Halyqaralyq aýyr atletıka federatsııasynyń prezıdenti Tamash Aıanǵa ІІ dárejeli «Dostyq» ordenin tabys etti, dep habarlady Premer-Mınıstrdiń baspasóz qyzmeti.
Úkimet basshysy Olımpıadalyq komıtettiń jumysyna, aýyr atletıka sportyn damytýǵa jáne ony jurtshylyqqa keńinen tanytýǵa qosqan qomaqty úlesi úshin T.Aıanǵa alǵys bildirdi. «Qazaqstanda Úkimet tarapynan aýyr atletıkany ári qaraı damytý úshin qoldaý kórsetý jalǵasatyn bolady», dedi S.Ahmetov.
T.Aıan óz kezeginde, Londonda ótken Olımpıada oıyndarynda jeti altyn medal, onyń ishinde aýyr atletıkadan tórt altyn medal qanjyǵalaǵan Qazaqstan quramasynyń buryn-sońdy bolmaǵan jetistigin atap ótti.
«Men qazaqstandyq sportpen, ásirese Aýyr atletıka federatsııasymen tyǵyz qarym-qatynasta jumys istep kelemin. Qazaqstanda daryndy jastar óte kóp. Osy sportty damytýǵa Qazaqstannyń orasan úles qosyp otyrǵanyna qýanyshtymyn. Sizderge kóp rahmet, bul marapat men úshin úlken qurmet», dedi T.Aıan. Bul týraly «Egemen Qazaqstan» gazeti búgingi sanynda habarlaıdy
