Aıana Joldas: komandalyq jarysta barymdy salamyn

LIVINЬO. KAZINFORM — Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynyń frıstaıl-akrobatıkadan básekeler bastaldy.

Áıelder arasynda jekeleı synda óner kórsetken Aıana joldas jalpy esepte 21-orynnan kórinip, aqtyq synǵa joldama ala almady. 

Otandasymyz jarystan keıin Kazinform tilshisimen suhbattasyp, óz ónerine baǵa berdi.

— Bar kúshimdi saldym. Jalpy, óz ónerime kóńilim tolady. Árıne, qos aıaqtap túse almadym. Biraq bul meniń eń sátti sekirýlerimniń biri boldy dep oılaımyn. Ekinshi sekirýdi ómirimde ekinshi ret qana jasadym. Sebebi Olımpıadaǵa sanaýly kún qalǵanda baǵdarlamamyzdy kúrdelendirdik, — dedi sportshy.

Aıana Joldas Olımpıada oıyndary aldynda jaraqat alyp, ota jasatqanyn jasyrmady.

— Shynymdy aıtsam, jeltoqsanda jaraqat alyp, ota jasattym. Odan keıin qalypqa kelýge uzaq ýaqyt ketti, búkil maýsymdy ótkizip aldym. Soǵan qaramastan Olımpıadada óner kórsetkenime óte rızamyn, — dedi ol.

Sóz sońynda, sportshy erteń jarys jolyna shyǵatyn komandalastaryna sáttilik tilep, komandalyq jarysta óner kórsetetinin eske saldy.

— Jigitterge senemin. Olar fınalǵa da, sýperfınalǵa da ótedi dep úmittenemin. Alda komandalyq jarysta bar kúshimdi salamyn, — dedi Aıana.

Aıta keterligi, búgin 11 qazaqstandyq sportshy tórt sport túrinen jarys jolyna shyǵady.

Osyǵan deıin habarlaǵanymyzdaı, Abzal Ájiǵalıev jáne Denıs Nıkısha shırek fınalda óner kórsetedi.