Aıan Hafız: «Jastar jyly» - múmkindiktermen qatar úlken jaýapkershilik
«Elbasy óz Joldaýynda: «Jastar men otbasy ınstıtýtyn keshendi qoldaý memlekettik saıasattyń basymdyǵyna aınalýǵa tıis. Jastardyń barlyq sanatyn qoldaýǵa arnalǵan sharalardy tolyq qamtıtyn áleýmettik satynyń aýqymdy platformasyn qalyptastyrý kerek. Kelesi jyldy «Jastar jyly» dep jarııalaýdy usynamyn. Biz aýyldyq jerlerdiń áleýmettik ortasyn jańǵyrtýǵa kirisýimiz qajet. Buǵan arnaıy «Aýyl - El besigi» jobasynyń iske qosylýy septigin tıgizedi. Bul joba arqyly óńirlerdegi eńbekke qatysty ıdeologııany ilgeriletýdi qolǵa alý kerek. Boıskaýt qozǵalysy sııaqty «Sarbaz» balalar-jasóspirimder birlestigin quryp, mektepterde áskerı-patrıottyq tárbıeniń rólin kúsheıtken jón. «Óz jerińdi tanyp bil» jańa bastamasy aıasynda elimizdiń óńirleri boıynsha jappaı mektep týrızmin qaıta jańǵyrtý kerek», - dedi.
«Mine, Elbasy alǵa qoıyp otyrǵan osy mindetterdi iske asyrýda, biz - jastar bul sharalardyń bel ortasynda júretin bolamyz. Óıtkeni, otansúıgishtik tárbıeniń qazirgi kezde mańyzdylyǵy bárinen de joǵary bolyp tur. Óz Otanyn súıgen jastar ǵana óz elin kórkeıte alady», deıdi Aıan Hafız.
Qazirgi kezde Aqmola oblysynda turatyn jastar sany 148 996, bul oblystaǵy jalpy halyq sanynyń 20,2 paıyzyn quraıdy. Ekonomıkalyq belsendi jastar 86 myńnan astam. Aýyldyq jerlerdegi jastar úlesi jalpy jastar sanynyń 55 paıyzyna teń.
«Búgingi tańda jastar úshin ózekti máseleler - bilim alý, jumysqa ornalasý, turǵyn úı jáne bos ýaqytty tıimdi paıdalaný bolyp tabylady. Bizdiń, jastardyń jan-jaqty damýy úshin elimizde biraz qajetti jaǵdaılar jasalǵan. Mysaly, tek Kókshetaý qalasynda «Qoljetimdi turǵyn úı-2020» baǵdarlamasynyń arqasynda 300-den astam jas otbasy baspanaly bolýǵa múmkindik aldy. «Jastar jylynda» Elbasynyń 5 áleýmettik bastamasynyń aıasynda jalpyǵa arnalǵan «7-20-25» baǵdarlamasynan bólek, oblysymyzdyń jas azamattary úshin jańa «Turǵyn úı» jobasynyń qabyldanǵanyn qalar edik. Sonymen qatar, joǵary oqý oryndaryn aıaqtaǵannan keıin jumysqa ornalasýdyń tıimdi júıesin qurý bolashaq jas mamandarǵa ózimizdiń áleýetimizdi keńirek iske asyrýǵa múmkindik berer edi. «2017-2021 jyldarǵa arnalǵan nátıjeli jumyspen qamtý jáne jappaı kásipkerlikti damytý» baǵdarlamasy bizdiń aımaǵymyzda oıdaǵydaı iske asyrylýda. Aǵymdaǵy jyldyń basynan beri 3 872 jas osy baǵdarlamanyń qatysýshysy boldy, onyń 1 842-i - aýyl jastary. Sondaı-aq, jastar is-tájirıbesi turaqty jumys ornyna ornalastyrýǵa múmkindik berdi», - dep tolyqtyrdy Aıan Hafız.
Sonymen qatar, onyń aıtýynsha, óńirde jyl saıyn jastardy qoldaý jáne kadr tapshylyǵy máselesin sheshý úshin jas azamattarǵa oblys ákiminiń ataýly shákirtaqysy taǵaıyndalady. Qazirgi ýaqytta elimizdiń túrli joǵary oqý oryndarynda 276 aqmolalyq jas oblys ákiminiń ataýly shákirtaqysynyń ıegeri retinde bilim alýda. Memleket basshysy da talaı ret óz sózinde jańa tıpti jas urpaqty tárbıeleýge erekshe nazar aýdaryp, básekege qabiletti, ádil, óz isine adal kásipqoı, máselelerdi sheshýde jańa tásilder qoldanatyn jastardy qoldaý týraly atap ótken bolatyn.
«Rýhanı jańǵyrý» baǵdarlamasy qoǵamda keń qoldaý alyp, jańǵyrý protsesterine zor talpynys berdi. Memleket basshysynyń bastamasymen usynylǵan «Aýyl - El besigi» jobasy aýyldyq jastarǵa ózin-ózi damytýda úlken múmkindik týǵyzady. Jastar sonymen qatar, «Tsıfrlyq Qazaqstan», «Latyn álipbıine kóshý», «Úsh tuǵyrly til» jáne taǵy basqa baǵyttarǵa belsene atsalysýda. Bul turǵyda, oblys jastary eriktiler qozǵalysyn qarqyndy damytýda.
Ár ýaqyttyń óz talaptary bar, keıde aǵa urpaq ókilderi jastardy eńbekke joq, erinshek dep synaıdy. Biraq, jastar ár salada bıik belesterdi baǵyndyryp, óz maqsattaryna jetýde. Búgingi urpaq yntaly, daryndy, talantty jáne jańa oılary bar azamattar. Dál osyndaı jastardyń kúsh biriktirýiniń arqasynda jalpyǵa ortaq eńbek qoǵamyn qura alamyz. Prezıdentimizdiń júktegen maqsat-múddelerin júzege asyrýda jas urpaq týǵan jerine, týǵan eline ereń eńbek eterine kúmánim joq», -dep sózin túıindedi Aıan Hafız.
