Aıaldamalarda kóktaıǵaq: Óskemende avtobýs júrgizýshileri men jolaýshylar shaǵymdanyp jatyr

ÓSKEMEN. KAZINFORM – Óskemen qalasyndaǵy qoǵamdyq kólik júrgizýshileri men jolaýshylar aıaldamalardaǵy kóktaıǵaqqa qatysty shaǵymdandy.

Kóktaıǵaq tek avtobýstarǵa ǵana emes, jolaýshylarǵa da qolaısyzdyq týǵyzǵan. Jol taıǵaqtyǵynan avtobýstar toqtaı almasa, azamattar qoǵamdyq kólikten shyqqanda taıyp qulap jatyr. 

— Jumysqa keshigip bara jatqanda aıaldamaǵa taıap qalǵan avtobýsqa júgire jóneldim. Sol kezde kóktaıǵaqtyń saldarynan qulap, aıaǵymdy aýyrtyp aldym. Tek men emes, jyǵylyp jatqandardy únemi kórip júrmiz. Ásirese qart kisilerdi obal ǵoı», — deıdi Bahtııar esimdi qala turǵyny. 

Dese de kommýnaldyq qyzmetter aıaldamaǵa qum men kóktaıǵaqqa qarsy materıaldar turaqty túrde tógiletinin jetkizdi. 

— Aıaldamalarǵa tıisti materıaldardy tógý únemi júrgizilýde. Biraq qum tez taptalyp ketedi. Sondyqtan bul jumystar kúni boıyna ýaqyt ıntervalymen júrgizilip jatyr, — dep habarlady «Taza Óskemen» KMK-dan. 

Eske salsaq, osyǵan deıin Óskemende kómir jaǵyp otyrǵan jer úıler ortalyqtandyrylǵan jylýǵa kóshirilýi múmkin ekendigi habarlanǵan.