Aıaldamadaǵy eki áıeldi qaǵyp óltirgen júrgizýshige qatysty qylmystyq istiń baby taǵy da ózgertildi
Prokýratýra júrgizýshige taǵylǵan qylmystyq istiń babyn taǵy da ózgertti. Endi ol QR QK 346-babynyń 5-bólimi boıynsha jaýap bermek.
«Tátibekov pen Kopernık qıylysynda bolǵan jol apatyna baılanysty qylmystyq is prokýratýranyń baqylaýynda. Protsessýaldy prokýror taǵaıyndaldy. Qazir ol 346-babynyń 5-bólimimen ıaǵnı, kólik júrgizý quqyǵy joq, mas kúıinde aıdaýdyń kesirinen eki nemese odan kóp adamnyń ólimine ákelgen jol apatyna sebepker boldy degen aıyppen qamalyp otyr», - dedi Almaty prokýratýrasynan.
Kúdikti qazir sot sanktsııasymen ýaqytsha oqshaýlaý ornyna jiberildi.
Aıta ketý kerek, jol apaty 16 naýryzda Medeý aýdanynda bolǵan. Tátibekov kóshesimen shyǵysqa bet alǵan Toyota Corolla júrgizýshisi kólikti basqara almaı qalyp, Reno Duster kóligine soǵylǵan bolatyn. Sosyn ekpinimen kelip aıaldamadaǵy úsh adamdy qaǵyp, jekemenshik úıdiń qorshaýyn qıratyp toqtaǵan. Oqys oqıǵa saldarynan aıaldamada turǵan 31 jastaǵy áıel qaıtys bolǵan edi.
Keshe taǵy bir áıeldiń aýrýhanada es jımastan kóz jumǵanyn habarladyq.