Aıaldama basyp qalǵan aqtóbeliktiń emine merdiger kompanııalar kómektesedi
AQTÓBE. QazAqparat - Aqtóbede eki balanyń anasyn aıaldama basyp qaldy. Qazir ol aýrýhanada em qabyldap jatyr. Merdiger kompanııa qajetti emge kómektesýge ýáde berdi, dep habarlaıdy QazAqparat tilshisi.
Aqtóbe qalasynda daýyl soǵyp, jol jóndeý jumystary kezinde tolyq bekitilmegen aıaldama ushyp ketken bolatyn. Saldarynan eki balanyń anasy zaqym alyp, eki omyrtqasy syndy. Qazir Sánııa Safına temirjol aýrýhanasynda emdelip jatyr.
«Jaǵdaıymdy surap kelýshi adamdar kóp. Aqtóbe qalalyq máslıhatynyń hatshysy men depýtattar keldi. Merdiger kompanııa da keshirim surap, kómek kórsetýge ýáde berdi. Qazirgi kezde aqyly emge óz aqshamdy jumsap, túbirtegin jınap jatyrmyn», - dedi zardap shegýshi S.Safına.
Aıta keteıik, oqys oqıǵadan soń Qylmystyq kodekstiń «Qaýipsizdik talaptaryna saı kelmeıtin taýarlardy shyǵarý nemese satý, jumystardy oryndaý ne qyzmetter kórsetý» baby boıynsha is qozǵalyp, tergeý jumystary bastaldy. Al qalalyq máslıhat hatshysy Sulýpan Shyntasova men depýtattar naýqastyń densaýlyǵyn bilý úshin aýrýhanaǵa bardy.
Sonymen qatar, S.Safınanyń aıaldamadan zardap shekken 9 jastaǵy balasy mektepke barǵanda túgel oqýlyqpen qamtamasyz etilip, densaýlyǵy baqylaýǵa alynady. Al merdiger kompanııa dári-dármekpen qamtamasyz etip, em-dom qabyldaý kezinde kómek beredi.
