Aıaldama astynda qalǵan aqtóbeliktiń eki omyrtqasy synǵan
AQTÓBE. AQTÓBE. QazAqparat - Aqtóbede aıaldamanyń temir qańqasy ushyp, áıeldi basyp qaldy, dep habarlaıly QazAqparat tilshisi.
Kúshti soqqan jeldiń saldarynan ushqan aıaldama qańqasynan zardap shekken Sanııa Safına qazir temirjol aýrýhanasynda em qabyldap jatyr. Eki balanyń anasy 13 tamyz kúni keshki daýylda bolǵan oqıǵany eske alady.
«Eki balammen avtobýsta kele jatyp, kishkentaıymnyń júregi aınyǵan soń Mánshúk Mámetova aıaldamasynan túsip qaldym. Sol jerde Álıhanǵa qarap otyryp, densaýlyǵyn suradym. Otyrǵan kezde daýyl soǵyp, aıaldama ushyp ketti. Men ulymdy qorǵap júrip, esimnen tanyp qaldym. Úlken balam stýdent edi. Sol bar kúshimen aıaldamanyń bir buryshyn ustap, meni aman alyp qaldy. Eki omyrtqama qatty zaqym kelgen. Eki aı tósekte jatyp, jyl boıy arnaıy kıim kıip júrýim kerek. Balam bolmaǵanda sol jerde jan tapsyratyn edim»,- dedi Sanııa Safına.
Oqıǵa bolǵan kúni tótenshe jaǵdaılar qyzmeti jeldiń jyldamdyǵy sekýndyna 15-20 metrge jetetinin eskertken bolatyn. Daýyl 5-10 mınýtqa sozylyp, bekitilmegen aıaldama ushyp ketti.
«Aıaldama qańqasy menen ótip, taǵy bir áıeldi jaralady. Sol kúni polıtsııa kelgen bolatyn. Olar oqıǵa ornyna barǵanda aıaldamanyń qańqasy joq bolyp shyqty. Biraq sol kezde bári telefondaryna túsirip turdy. Qazir polıtsııaǵa baryp, túsinikteme berýge adamdarda ýaqyt ta joq. Bárin de túsinemin. Degenmen men sotqa shaǵym túsiremin. Balam Almatyǵa oqýǵa ketedi, kishkentaıym mektepke barýy kerek. Jaqynda demalys alyp, bárine daıyndyq jasaýym kerek edi. Al men aýrýhananyń tósegine tańyldym. Osy úshin jaýapty adamdar jazalanýy tıis»,- dedi S.Safına
Bul oqıǵaǵa baılanysty, Aqtóbe qalalyq ákimdigi ózderiniń ýájderin aıtty.
«Mánshúk Mámetova kóshesinde jol jóndeý jumystary jalǵasýda. Áli qoldanysqa berilgen joq. Merdiger kompanııanyń habarlaýynsha, júrginshiler jolyn salý jumystary júrip jatqan soń aıaldama qańqasy ózge jerge qoıylǵan. Ol jer avtobýs aıaldamasynan qashyq. Qazir oqıǵanyń mán-jaıy anyqtalyp jatyr»,- dedi ákimdik.
