«Aıalaǵan Astana» konkýrsy talanttarǵa jol ashady
ASTANA. QazAqparat - Qala kúni merekesi qarsańynda Qazaqstan turǵyndary «Aıalaǵan Astana» mýzykalyq balalar baıqaýynyń qorytyndysyn tamashalaıdy, dep habarlaıdy Astana qalasynyń 16 jyldyǵyna arnalǵan merekelik sharalardy daıyndaý jáne ótkizý jónindegi uıymdastyrý komıtetiniń medıa-shtaby.
Jobanyń basty maqsaty - elimizdegi jas talanttarǵa jol ashý, olardyń shyǵarmashylyq áleýetin damytý jáne odan ári qabiletterin shyńdaý.
Fınal úsh baıqaý kúnderine bólingen: «Balalyq shaq ánurany»(4 shilde), «Juldyzdarmen dýet jáne álemdik hıt» (5 shilde), «Atameken» (6 shilde). Osy kúnder qorytyndysyna sáıkes, halyqaralyq qazylar alqasy men telekórermender «Balalar jańa tolqynynda» Qazaqstan namysyn qorǵaýǵa múmkindik alatyn Gran-Prı ıegerin anyqtaıtyn bolady. Sonymen qatar, 1,2,3 oryndar, Kórermen kózaıymy men 1 mıllıon teńge (balanyń shyǵarmashylyq qabiletin odan ári damytýǵa baǵyttalady) syılyq qory bar arnaıy qarjylaı syılyqtar qarastyrylǵan.
«Aıalaǵan Astana» jobasynyń 2014 jyly naýryz-sáýir aılarynda ótkizilgen irikteý kezeńine elimizdiń Almaty, Taldyqorǵan, Taraz, Shymkent, Qyzylorda, Qostanaı, Oral, Atyraý, Aqtaý, Aqtóbe, Qaraǵandy, Pavlodar, Semeı , Kókshetaý, Petropavl, Astana syndy 16 qalasynan 8-12 jasar 1000 bala qatysty.
Mamyr aıynyń orta sheninde sarapshylar bıylǵy jyly óner dodasynda fınalǵa shyqqan eń talantty 17 balanyń esimin atady. Olar: Lýıza Nurqýatova (Aqtaý); Zamıra Saǵadıeva (Zerendi); Danııa Ishanqulova (Oral q); Muhammedálı Júginisov (Astana); Dılnaz Tólegen (Qyzylorda); Dıas Omar (Qyzylorda); Nastıa Pershıkova (Pavlodar); Jahan Qabiken (Astana); Malıka Smaǵulova (Pavlodar); Dılnýra Birjanova (Qaraǵandy); Ǵalımurat Ábdimanapov (Jezkazǵan); Janaıkerim Ótegenov (Qostanaı); Aldııar Oreken (Ekibastuz); ıAsmın Majıtova (Almaty); Saǵynǵan Qýanǵan (Astana); Ádilet Meırambekov (Kókshetaý), Alýa Beresheva (Almaty).
2014 jyly 1mamyr Halyqaralyq balalardy qorǵaý kúni Astanada «Aıalaǵan Astana» ulttyq mýzykalyq televızııalyq balalar baıqaýynyń fınalısterine qurylǵan arnaıy mýzykalyq mektep ashyldy. Mereke kúni bir-birimen alǵash júzdesken balalar Lına Arıfýllınanyń sheberhanasyndaǵy akterlik sheberlik, solfedjıo jáne vokaldan máskeýlik tájirıbeli ustazdarmen tanysty.
Fınalıster maýsym aıy boıy astanalyq mýzykalyq mektepte vokaldyq qabiletterin shyńdap, Rýslan Butabaevtyń jetekshiligindegi «Zaratushtra Band» jandy orkestriniń súıemeldeýimen ótetin televızııalyq shoýǵa daıyndalady.
Fınalda 12 kontserttik nómir qoıylady. Qatysýshylardyń bir bóligi jekeleı án oryndasa, bir bóligi dýet pen trıoda óner kórsetedi.
