«Aıalaǵan Astana» baıqaýynyń qosymsha irikteý kúni 10 mamyrǵa belgilendi
ASTANA. QazAqparat - 10 mamyr kúni «Aıalaǵan Astana» Ulttyq televızııalyq mýzykalyq balalar baıqaýynyń qosymsha irikteý kúni ótedi. Bul týraly búgin ótken baspasóz máslıhatynda baıqaýdyń bas prodıýseri Lına Arıfýlına aıtty.
Aıta ketý kerek, atalǵan baıqaýǵa irikteý týry keshe aıaqtalǵan bolatyn. Alaıda uıymdastyrýshylar aqyldasa kele, Astana jáne Almaty qalalarynda 10 mamyr kúni qosymsha irikteý kúnin ótkizýdi jón kóripti.
«Biz elimizdiń barlyq qalalarynda 8-12 jas aralyǵyndaǵy 1000-nan asa ónerpaz balalardy tyńdadyq. Degenmen áli de qanshama balalar irikteýge kele almaı qaldy. Biz solar úshin 10 mamyr kúni Astana men Almaty qalalarynda taǵy bir kún irikteý júrgizýdi uıǵardyq», - dedi L. Arıfýlına.
Baıqaýdyń qorytyndysy 4, 5, 6 shildede - Astana kúnderinde ótkiziledi. Gran-prı ıegeri Qazaqstan atynan «Detskaıa Novaıa Volna» baıqaýynda óner kórsetýge múmkindik alady.
Ár qalada ótken irikteý syndarynda Qazaqstannyń estrada juldyzdary ózderiniń kóńilinen shyqqan jas ónerpazdardy usynady. Al «Detskaıa Novaıa volna» baıqaýynyń uıymdastyrýshylary olardyń usynystaryn eskere otyryp, sońynda óz sheshimderin qabyldaıdy. Jas ánshilerge tálimger bolyp, jetekshilik jasaýǵa Nurlan Alban, Marjan Arapbaeva, Batyr Baınazarov, Erbolat Bedelhan («Orda» toby), Almas Kishkenbaev, Danııar Ótegen («Rin-Go» toby), ADAM, Aıqyn, Álisher Kárimov, Anel Árinova syndy ánshiler kelisim bergen.
Uıymdastyrýshylardyń aıtýynsha, jartylaı fınalǵa ótken qatysýshylar bir aı boıy Astana qalasynda Lına Arıfýlına sheberhanasynan, Máskeýden arnaıy kelgen bilikti tálimgerlerden vokal, solfedjıo, akterlik sheberlik boıynsha sabaq alady. Sonymen qatar, Rýslan Botabaev bastaǵan «Zaratushtra Band» orkestriniń súıemeldeýimen ótetin televızııalyq shoýǵa daıyndalady. Sońynda fınalıstermen 12 kontserttik qoıylym daıyndalady. Keıbir ánshiler jeke oryndaýshy retinde óner kórsetse, keıbiri dýet, trıo bolyp birigedi.
Aıta keteıik, baıqaýdyń fınaly úsh kúnnen turady: «Balalyq shaq ánurany» (4 shilde), «Juldyzben dýet jáne álemdik hıt» (5 shilde), «Atameken» (6 shilde). Osy kúnder qorytyndysy boıynsha halyqaralyq qazylar alqasy men kórermender (olar tikeleı efır arqyly ózi qalaǵan qatysýshyǵa daýys bere alady) jeńimpazdy anyqtaıdy.
